: नेपाल सुपर लिग(एनएसएल)को अनुशासन समितिले पोखरा थन्डर्सलाई कारबाही गरेको छ। बुधबार दशरथ रंगशालामा भएको पोखरा थन्डर्स र ललितपुर सिटिएफसी बीचको खेलमा मैदानमा गरेको अनैतिक व्यवहारका कारण पोखरालाई कारबाही गरिएको हो।
पोखरा थन्डर्सका किट म्यानेजर सुन्दर थापालाई एनएसएल २०२५ सिजनभरि रंगशाला प्रवेशमा बन्देज लगाइएको छ। दीपक श्रेष्ठलाई दुई खेलसम्म मैदान प्रवेशमा रोक लगाइएको छ। पोखरा थन्डर्सको अफिसियल टिमलाई ५० हजार जरिवाना गरिएको छ।
खेलको बीचमा अनैतिक र अशोभनीय क्रियाकलाप गरेको भन्दै आयोजक टिमको अनुशासन समितिले पोखरालाई कारबाही गरेको हो। खेलको दौरान पोखराले ८१ औँ मिनेटमा कप्तान नवयुग श्रेष्ठले प्रहार गरेको बल ललितपुरका गोलकिपर जेफराले बचाउ गरेका थिए।
उक्त प्रहारले गोललाइन क्रस गरिसकेको भन्दै गरेको पोखराको टिम र अफिसियलले गोलको माग गरेका थिए। उक्त विषय लम्बिँदा पोखराको अफिसियल टिम र रेफ्रीबीच भनाभन भएको थियो। चर्काचर्कीको दौरान किट म्यानेजर सुन्दर थापाले प्रतियोगिता निर्देशक सञ्जीव मिश्रलाई भुइँमै लडाइदिएका थिए। सोही क्रियाकलापलाई एनएसएलको अनुशासन समितिले अशोभनीय भन्दै कारबाही गरेको हो।
त्यस्तै, आयोजकले अन्य कुनै पनि टिमलाई मैदानमा यस्ता क्रियाकलाप नदोहोर्याउन अनुरोध गरेको छ।
