— नेकपा (माओवादी केन्द्र) संसदीय दलका नेता हरिबहादुर चुमानले सम्बोधनको क्रममा प्रयोग गरेको `जय हिन्द´ शब्द र सम्बन्धित वाक्यांश गण्डकी प्रदेश सभाको रेकर्डबाट हटाइएको छ ।
सभामुख कृष्णप्रसाद धितालले शुक्रबारको प्रदेश सभा बैठकमा गत चैत १८ मा प्रयोग भएको शब्द रेकर्डबाट हटाउन प्रदेशसभा सचिवालयलाई निर्देशन दिएका हुन् । ‘नेपाली कांग्रेसका एक जना नेतालाई एक जना कार्यकर्ताले के छ हालखबर ? जय हिन्द त होला भनेको मैले सुनेको छु । के छ हालखबर ? जय हिन्द त होला भनेपछि...´ भन्ने वाक्य रेकर्डबाट हटाउन सभामुख धितालले निर्देशन दिएका हुन् ।
गण्डकी प्रदेश सभा नियमावली २०८० को नियम २० (घ)विपरीत भएको भन्दै कांग्रेस प्रमुख सचेतक नन्दप्रसाद न्यौपाने र सांसद डिल्लीराम सुवेदीले नियमापत्ति गरेका थिए । नियमावलीको नियम २० (घ)मा अशिष्ट, अश्लील, अपमानजनक, आपत्तिजनक शब्द वा सार्वजनिक शिष्टाचार वा नैतिकता प्रतिकूल हुने गरी बोल्न नहुने व्यवस्था छ ।
नेकपा (एमाले) सांसद देवका पहारी त्रिपाठीले संसद्मा प्रयोग गरेको `फरक क्षमता भएका´ भन्ने शब्द पनि रेकर्डबाट हटाइएको छ । गत चैत १३ मा अपाङ्गता भएका व्यक्तिको अधिकार सम्बन्धमा व्यवस्था गर्न बनेको विधेयकमाथिको छलफलको क्रममा सांसद पहारीले उक्त शब्द प्रयोग गरेकी थिइन् । त्यसपछि अपाङ्गता समुदायको प्रतिनिधित्व गर्ने कांग्रेस सांसद सुनिता थापाले `फरक क्षमता भएका´ नेपालको संविधान र प्रचलनमा नरहेकाले रेकर्डबाट हटाउन माग गरेकी थिइन् ।
