। राप्रपा नेपालका अध्यक्ष कमल थापाले राजावादी विचार बोक्ने शक्तिहरूबीच एकतामा जोड दिएका छन् ।
सरकार र गणतन्त्रवादी दलहरूले राजा र राजावादी विचार बोक्नेहरूविरुद्ध अनेक भ्रम फैलाएर कमजोर बनाउने प्रयास गरिरहेको भन्दै थापाले एकतामा जोड दिएका हुन् ।
हालै निधन भएका राप्रपा नेपालका प्रवक्ता वसन्तमान सिंह अधिकारीको १३औं पुन्यतिथिमा आयोजित श्रद्धाञ्जली सभामा बोल्दै थापाले तीनकुने घटनालाई देखाएर राजावादी विचार निस्तेज पार्ने प्रयास भइरहेको बताए ।
तीनकुने घटनाको जिम्मा सरकारले लिनुपर्ने बताएका उनले प्रहरी हिरासतमा अनुसन्धानमा रहेका राप्रपा नेताहरू रवीन्द्र मिश्र र धवलशमसेर राणा लगायतका व्यक्तिलाई थुनामुक्त गर्न आग्रह गरे ।
राजसंस्थासहित हिन्दूराष्ट्रको मान्यताको मुद्दा बोक्ने राजावादीहरू एक ठाउँमा उभिनुको विकल्प नरहेको भन्दै उनले गणतन्त्रवादीहरूले राजालाई बदनाम गरी झुटा आरोप लगाइरहेकाले प्रतिरक्षाका लागि पनि एकठाउँमा उभिनुपर्ने तर्क गरे ।
‘म देशभरका राष्ट्रवादी साथीहरूलाई आग्रह गर्न चाहन्छु– अहिले जसरी राजालाई बदनाम गर्ने, झुटा आरोप लगाउने, हिन्दूराष्ट्रको मान्यता र राजसंस्थासहितको प्रजातन्त्रको विचारलाई निषेध गर्ने, समाप्त पार्ने प्रयास भइरहेको छ,’ थापाले भने, ‘त्यसबाट सजग भएर आफ्नो आस्था र विचारको प्रतिरक्षाको निमित्त सबै राष्ट्रवादीहरू एकठाउँमा उभिनुकोे विकल्प छैन ।’
सानातिना मतभेद र व्यक्तिगत स्वार्थको कारण अलग देखिएका राजावादीहरू एक ठाउँमा आएर आफ्नो आस्थाको प्रतिरक्षा नगरे भविश्यमा पछुताउनुपर्ने थापाको भनाइ छ ।
अध्यक्ष थापाले गणतन्त्रवादीहरूले चाहे अनुसार भए पद र दल मात्र नभई वैचारिक अस्तित्व नै संकटमा पर्ने दावी गरे ।
‘हाम्रो विचारलाई, राजालाई बदनाम गर्न खोजिरहेका छन् । हिन्दूराष्ट्रको मान्यता र राजसंस्थालाई भ्रमपूर्ण ढंगबाट कमजोर बनाउन खोजिरहेका छन् । यदि उनीहरूले चाहे अनुसार भयो भने हाम्रो पद र दल मात्र होइन हाम्रो वैचारिक अस्तित्व नै संकटमा पर्छ,’ उनले भने ।
राष्ट्रिय प्रजातन्त्र पार्टीका नेता डा. प्रकाशचन्द्र लोहनी र विक्रम पाण्डेले पनि विचार मिल्ने सबै शक्ति एकैठाउँमा आएर आन्दोलनमा जानुपर्ने धारणा राखे । कार्यक्रममा राप्रपा नेपालका महामन्त्री राजाराम बर्तौला, जगत गौचन, सुमनमान सिंह अधिकारी, अन्जना रावलले पनि बोलेका थिए ।
