। चितवनको मुख्य बजार नारायणगढदेखि पूर्वतर्फ गोन्द्राङसम्मको ६ किलोमिटर लामो ‘सिक्स लेन’ सडक विस्तारको काम सकिएको छ । एसियन मापदण्डको हाइवे अन्तर्गत यो सडकखण्डको काम सकिएसँगै भरतपुर-नारायणगढ सडक क्षेत्र चिटिक्क देखिएको छ ।

सडक विस्तारको जिम्मा पाएको सगुन कन्स्ट्रक्सन प्रालिले सडक विस्तारको काम गत २८ पुसमा सकिएको जनाएको छ । सगुन कन्स्ट्रक्सनका प्रमुख सहदेव खड्काले सडक विस्तारको काम विभिन्न अवरोधका बाबजुद पनि सम्पन्न भएको बताए ।




उनले कोभिड महामारी, निर्माण सामग्रीको अभाव, सरकारले बजेट निकासमा गरेको ढिलाइ, खानेपानीको पाइप लाइन तथा नारायणगढ बजार क्षेत्र तथा भरतपुर विमानस्थल अगाडिका घर टहरा भत्काउन भएको समस्याले गर्दा समयमा नै काम सम्पन्न गर्न समय लागेको बताए ।

निर्माण कम्पनी सगुनले २८ महिनाभित्र काम सक्ने गरी २६ असोज २०७७ मा ठेक्का सम्झौता गरेको थियो । सुरुमा एक अर्ब १२ करोड रुपैयाँमा काम सक्ने गरी सडक विस्तारको सम्झौता भए पनि पछि लागत बढेर एक अर्ब ७६ करोड रुपैयाँ पुगेको हो ।




पहिले दुई लेन मात्रै रहेको सडकलाई विस्तार गरेर बीचमा चार लेन र दुवै साइडतर्फ थप १/१ सर्भिस लेन तयार गरिएको छ । सडक विस्तारसँगै दुवैतर्फ ६ सय सडक बत्ती जडानको काम पनि सकिएको छ । रातको समयमा बत्ती बल्दा सडक झिलिमिली देखिन्छ । भरतपुरबाट नारायणगढ झर्ने ठाडो ओरालो काटेर त्यसको स्लोप घटाइएको छ । भरतपुर ओरालोको उचाइ ६० सेन्टिमिटरदेखि १.२ मिटरसम्मले घटाइएको हो । जसले गर्दा दुर्घटनाको जोखिम समेत कम भएको निर्माण कम्पनीको दाबी छ ।



५० मिटर चौडाइ रहने ६ लेनको सडक क्षेत्रमा फुटपाथ, ढल, सर्भिस लेन, स्मार्ट लाइट जडान र बिजुली अन्डरग्राउन्ड गरिएको छ । चौबिसकोठीदेखि भरतपुर ओरालोसम्मको सडकको पानी पुंगी खोलामा र चौबिसकोठीदेखि बसपार्कसम्मको पानी केरुङ्गा घोलमा लैजाने गरी ड्रेन तयार गरिएको निर्माण कम्पनीका प्रमुख खड्काले जानकारी दिए । निर्माण सकिएको ५ वर्षसम्म सडक बिग्रिएमा मर्मतको काम ठेकेदारले नै गर्ने छ । सडकको कालोपत्र अन्तर्राष्ट्रिय गुणस्तरको गरिएको निर्माण कम्पनीका प्रमुख खड्काले दाबी गरे । १० एमएमको डीबीएम, ४ एमएमको अस्पाल्ट गरिएको उनले बताए ।

सडकको दायाँबायाँ ११.५/११.५ मिटर कालोपत्र गरिएको छ । त्यसको बीचमा ३ देखि ४ मिटरको मेडियन, मुख्य सडकको छेउमा नाली र त्यसभन्दा बाहिर ५.५ मिटरदेखि ६ मिटरसम्मको सर्भिस लेन तयार गरिएको छ । मेडियनमा दुबो लगाउने र आर्कषक फूलहरूका बिरुवा रोप्ने काम भएको छ । बजार क्षेत्रमा भने दुबो लगाउने र बिरुवा रोप्ने काम अझै बाँकी छ ।

सडक विस्तार गरे पनि लेन अनुसारको सवारी चलाउने काम अझै भएको छैन । स्थानीय रुटमा चल्ने सवारीलाई सर्भिस लेनबाट चलाउनुपर्नेमा मुख्य सडक क्षेत्रमा नै अटो म्याजिक तथा स्थानीय रुटका सवारीहरू गुडिरहेका छन् ।
बीचको मेडियन र सर्भिस लेनको डिजाइन विभिन्न ठाँउमा फरक–फरक रहेको निर्माण कम्पनीका प्रमुख खड्काले बताए । ‘यो सडक जसरी पनि बनाउनुपर्छ भन्नेमा हामी लागेका थियौं, सरकारले चालु वर्षमा निकै कम बजेट छुट्टाएको भए पनि हामीले रकम नलिइकन नै कामलाई जारी राख्यौं, सरकारले दिन्छ भन्ने विश्वासका साथ काम गरियो,’ निर्माण कम्पनीका प्रमुख खड्काले भने, ‘यो सडक तयार हुँदा आधुनिक र आर्कषक भरतपुर बन्छ भन्ने विश्वास हामीलाई थियो ।’ सडकलाई आर्कषक बनाउन भरतपुर महानगरपालिकाले पनि सहयोग गर्दै आएको छ । नारायणगढ बजार क्षेत्रमा सडक सीमा मिचेर बनाइएका घर टहरा भत्काउन सडक डिभिजन कार्यालयलाई महानगरले सहजीकरण गरेको थियो ।

सडकमा ट्राफिक चिह्न राख्ने, जेब्राक्रसलगायत लाइनिङका कामले सडक आर्कषक देखिएको छ । सर्भिस लेनबाहिर दुवैतर्फ तीनदेखि चार मिटरको फुटपाथ बनाइएको छ । फुटपाथमा गाडी राख्ने, धुने जस्ता कामले यात्रुलाई असहज भएको देखिन्छ ।

सडक विस्तार गरे पनि लेन अनुसारको सवारी चलाउने काम अझै भएको छैन । स्थानीय रुटमा चल्ने सवारीलाई सर्भिस लेनबाट चलाउनुपर्नेमा मुख्य सडक क्षेत्रमा नै अटो म्याजिक तथा स्थानीय रुटका सवारीहरू गुडिरहेका छन् ।

के हो एसियन मापदण्डको हाइवे ?

एसियन मापदण्ड अनुसार विशेष गरी सहरी क्षेत्रमा बीच सडकको ५० मिटरबाहेक दायाँबायाँ २ लेनको सर्भिस सडक बन्छ । बीचको ४ लेन द्रुत मार्गको हुनेछ । बीचको सडक द्रुत मार्ग भएका कारण सहरी क्षेत्रमा दायाँबायाँ २ लेन सर्भिस रोड निर्माण हुन्छ । एडीबी आयोजना निर्देशनालयका अनुसार यस बाहेक फुटपाथ र ड्रेनसमेत बन्नेछ ।



२५ चैतमा सडक उद्‍घाटन

६ लेनमा विस्तार भएको भरतपुरको आर्कषक सडक उद्‍घाटनका लागि प्रधानमन्त्री केपी शर्मा ओली आगामी २५ चैतमा चितवन आउने भएका छन् ।

१७ माघ २०७७ मा तत्कालीन प्रधानमन्त्रीका रूपमा ओलीले सडक विस्तारको शिलान्यास गरेका थिए । सो दिन उनले शिलान्यास गरेको सिटी हल भने अझै तयार भएको छैन । प्रधानमन्त्री ओली आउने भएपछि जिल्लामा सुरक्षा तयारी थालिएको छ ।

शिलान्यास गरेको २ वर्षभित्र सडक विस्तार सक्ने भनिए पनि चार वर्षपछि मात्रै सडकको काम सकिएको हो ।

‘भोलि थाइल्यान्डबाट प्रधानमन्त्री स्वदेश फर्किनु हुन्छ, पर्सितिर थाहा हुन्छ, विभागले तयारी गर्नु भनेको छ,’ सडक डिभिजन कार्यालयका सूचना अधिकारी कृष्ण आचार्यले भने, ‘तयारीको काम सुरु भएको छ । ’

सडक विस्तारको काम सम्पन्न भएर हस्तान्तरण भइसकेको जानकारी दिँदै आचार्यले प्रधानमन्त्रीबाट औपचारिक रूपमा उद्घाटन गरिने बताए । भरतपुर एयरपोर्ट अगाडि स्तम्भ बनाउने तयारी छ । सोही ठाँउमा नै प्रधानमन्त्री ओलीले सडकको शिलान्यास गरेका थिए ।