: बुटवल–नारायणगढ सडक खण्डको दाउन्ने क्षेत्रमा दैनिक १० घण्टा सवारी साधन रोकेर सडक विस्तार गर्ने तयारी गरिएको छ।
दाउन्ने सडक खण्डको १३ किलोमिटरको दूरी पार गर्न ८ देखि १० घण्टासम्म लाग्न थालेपछि सरोकारवालाहरूको बैठकले दिउँसो र रातिको समयमा सवारी साधन रोकेर सडक विस्तार गर्ने तयारी गरेका हुन्।
पूर्वी र पश्चिम नवलपरासीका सरोकारवालाहरूको शनिबार बसेको बैठकले दिउँसो र रातिको समय गरी कुल १९ दिन सवारी साधन बन्द गरेर सडक विस्तार गर्नका लागि गृह मन्त्रालयमा अनुमति माग गरेको नवलपरासी पश्चिमका सहायक प्रमुख जिल्ला अधिकारी पोषणराज भण्डारीले बताए।
जसअनुसार आगामी चैत २७ गतेदेखि ३० गतेसम्म चार दिन बिहान ११ बजेदेखि दिउँसो ३ बजेसम्म र २०८२ वैशाख १ गतेदेखि १५ गतेसम्म राति ११ बजेदेखि बिहान ५ बजेसम्म सवारी साधन रोकेर सडक विस्तार गरिने तयारी गरिएको हो। त्यसका लागि गृह मन्त्रालयमा अनुमति माग गरिएको सहायक प्रमुख जिल्ला अधिकारी भण्डारीले बताए।
बैठकमा पूर्वी र पश्चिम जिल्लाका समन्वय समिति प्रमुख, सुरक्षा निकायका प्रमुख, पूर्वी नवलपरासीको विनयी त्रिवेणी र पश्चिम नवलपरासीका बर्दघाट र सुनवलका जनप्रतिनिधिहरू, आयोजना र निर्माण कम्पनीका प्रतिनिधिहरूको सहभागिता रहेको थियो।
आयोजना र निर्माण कम्पनीको माग अनुसार सडक विस्तारका लागि सवारी साधन बन्द गर्नुपर्ने सुझावका आधारमा गृह मन्त्रालयमा अनुमति मागिएको भण्डारीले बताए। दाउन्ने क्षेत्रका ठाउँ ठाउँमा खाल्डाखुल्डी भएका कारण दैनिकजसो सवारी साधन बिग्रने र सडक नै अवरोध हुँदा यात्रुहरूलाई ४५ मिनेटको बाटो पार गर्न ८ देखि १० घण्टा लाग्ने गरेको छ।
दुम्कीबासदेखि दाउन्ने हुँदै बर्दघाटसम्मको बाटो निकै जोखिमपूर्ण छ। त्यस क्षेत्रमा विस्तारका क्रममा भत्काइएका सडक, साँघुरो घुम्ती, निर्माणका लागि बनाइएका अस्थायी डाइभर्सन र धुलाम्मे बाटोले यात्रालाई कष्टकर बनाएको हो। सडक निर्माण सुरु भएको ६ वर्ष यताकै अहिले सबैभन्दा तीव्र गतिमा काम भइरहे पनि दाउन्ने सडकमा भने विस्तारको काममा समस्या भएकाले यात्रुले सास्ती खेप्नु परेको हो।
११४ किलोमिटर लम्बाइको सडक पूर्वी खण्ड र पश्चिम खण्ड गरी दुई खण्डमा विभाजित गरी काम अघि बढाइएको छ। अहिलेसम्म ६५ किमी एकतर्फी र २२ किमी दुईतर्फी सडक कालोपत्रे भएको आयोजनाले जनाएको छ। २०७५ चैतमा काम सुरु गरेको आयोजनाले समयमा काम सम्पन्न नगरेपछि पटक पटक म्याद थपिएको छ। पछिल्लो समय २०८२ साउन ८ गतेसम्म काम सक्ने गरी म्याद थप गरिएको छ।
