: नेपाल सुपर लिग (एनएसएल)मा एफसी चितवन र झापा एफसीले अंक बाँडेका छन्। त्रिपुरेश्वरस्थित दशरथ रंगशालामा भएको खेलमा एफसी चितवनले झापालाई १-१ खेलेका हुन्।
इन्जुरी टाइममा पेनाल्टीमार्फत झापाले गोल गर्दै चितवनसँग अंक बाँडेको हो। खेलको निर्धारित ९० मिनेटको समयमा १-० ले अग्रता बनाइरहेको चितवनसँग इन्जुरी टाइमको चौथो मिनेटमा गोल गर्दै झापाले एक अंक सुनिश्चित गरेको हो।
दोस्रो हाफको इन्जुरी टाइममा ७ मिनेटको समय थप गरिएको थियो। त्यसको दोस्रो मिनेटमा चितवनका निरोध चौधरीले झापाका अरुण थापालाई डिबक्स भित्र लडाएपछि झापाले पेनाल्टी पाएको थियो। पेनाल्टीमा झापाका लागि अल्हाजी गेरोले गोल गरेका हुन्।
खेलको पाँचौं मिनेटमा चितवनका भिक्टर मानसारेले बक्स बाहिरबाट हानेको बल झापाका किपर एन्जल श्रेष्ठले बचाए। त्यसको तीन मिनेटपश्चात् चितवनका शिशिर लेखीले राम्रो मौका गुमाए।
खेलको २८औं मिनेटमा चितवनले गोल गर्दै अग्रता बनायो। चितवनका लागि टोरेक जेब्रिनले गोल गर्दै चितवनलाई पहिलो हाफमा १-०को अग्रता दिलाएका थिए। शिशिर लेखीले दिएको पासमा जेब्रिनले उत्कृष्ट गोल गरेका हुन्।
पहिलो हाफ १-० ले अग्रता बनाएको चितवनले दोस्रो हाफमा भने गोल गर्न सकेन। खेलको ८२ औ मिनेटमा झापाका अविनाश स्याङ्तानले हानेको प्रहार गोल पोस्ट छेउबाट बाहिरिएको हो।
खेलको ८८ औँ मिनेटमा झापा झापाका लाजार आर्षिकले हानेको फ्री किक क्रस पारमा लागेर फर्कियो। झापा र चितवन दुवै टिमको यो तेस्रो खेल थियो। चितवनले यसअघिको दुई खेल जितेको थियो। यसअघिको दुवै खेलमा झापाले अंक बाँडेको थियो।
