— इजरायली सेनाले गाजाको खान युनिसस्थित नासेर अस्पताल नजिकै पत्रकारहरू बसेको टन्टमा बम आक्रमण गर्दा कम्तीमा दुई जनाको मृत्यु भएको छ भने सात जना घाइते भएका छन् ।
यसअघि इजरायली सेनाले केन्द्रिय डेइर अल-बलाहका पाँच वटा बस्तीका बासिन्दालाई तत्काल खाली गर्न आदेश दिँदै गरेको आक्रमणमा ५० भन्दा बढी व्यक्तिहरूले ज्यान गुमाएका थिए ।
त्यस्तै इजरायली सुरक्षाकर्मीले कब्जामा लिएको पश्चिमी किनारमा एक प्यालेस्टिनी–अमेरिकी बालकको गोली हानी हत्या गरिएको बताइएको छ । यता दक्षिणी लेबनानमा दुई जना मारिएका छन् ।
गाजाको स्वास्थ्य मन्त्रालयका अनुसार हालसम्म इजरायलको आक्रमणमा कम्तीमा ५० हजार ६९५ प्यालेस्टिनीले ज्यान गुमाइसकेका छन् भने १ लाख १५ हजार ३३८ जना घाइते भएका छन् ।
गाजाको सरकारी सञ्चार कार्यालयले मृत्यु संख्या ६१ हजार ७ सय नाघेको जनाएको छ । जसमा भग्नावशेषमा अझै फसेका हजारौं मानिसहरूलाई हराइरहेका (मृत मानिएका) का रूपमा सूचीबद्ध गरिएको छ।
हमास–इजरायलबीच युद्धको सुरुवात २०२३ अक्टोबर ७ मा हमास नेतृत्वको आक्रमणबाट भएको थियो । उक्त आक्रमणमा परी इजरायलमा १ हजार १३९ जनाको मृत्यु भएको थियो भने २०० भन्दा बढीलाई बन्धक बनाइएको थियो ।
