: युथ ओडीआई सिरिजको दोस्रो खेलमा नेपालमाथि १ रनको नाटकीय जित निकाल्दै अफगानिस्तान यू१९ टिमले युथ ओडीआई सिरिज आफ्नो नाममा गरेको छ।
मुलपानी क्रिकेट मैदानमा टस जितेर ब्याटिङ गरेको अफगानिस्तानले निर्धारित ५० ओभरमा अलआउट हुँदै १६८ रन जोड्यो। अफगानिस्तानले दिएको १६९ रनको विजयी लक्ष्य पछ्याएको नेपाल ४९.३ ओभरमा १६७ बनाउँदै अलआउट भएको हो।
अन्तिम ओभर ११ रन चाहिँदा नेपालका लागि ध्रुव सोनारले पहिलो र तेस्रो बलमा २ चौका प्रहार गर्दै खेललाई रोमाञ्चक बनाएका थिए। नेपाललाई जितका लागि ३ बलमा ३ रन चाँहिदा ४९.४ ओभरमा महबुब खानले फालेको बललाई अम्पायरले नो-बलको इशारा दिएका थिए। ध्रुव सोही बलमा रन आउट हुँदा नेपाल १६७ रनमा अलआउट भएको हो।
नेपालका लागि ओपनर ब्याटर साहिल पटेलले सर्वाधिक ६४ रन बनाए। उनले ११९ बलमा ६ चौका प्रहार गरेका हुन्। अर्का ओपनर निरज कुमार यादवले १५ रन बनाए। कप्तान नरेन भट्टले १३ रन बनाए। अभिषेक तिवारीले २४ रन बनाए। ध्रुवले २१ रन बनाए। विपिन शर्मा शून्यमा अविजित रहे।
अफगानिस्तानका लागि वाहिदुल्लाह जद्रान, जैतुल्लाह शाहिन र हाफिज जद्रानले समान २–२ विकेट लिए। रोहुल्ला अरब, महबुब खान र उजाइरुल्ला नियाजाइले समान १–१ विकेट लिए।
पहिलो इनिङ्समा ब्याटिङ गरेको अफगानिस्तानका लागि कप्तान महबुब खानले सर्वाधिक ५८ रन बनाए। उनले ११४ बलमा १ चौका प्रहार गरे। ओपनरद्वय उजाइरुल्लाह नियाजाइ र खालिद अहमदजाइले क्रमशः १९ र १० रन बनाए। नाजिफुल्लाह अमिरीले १६, खातिर स्तानिकाजाइले ११ र रोहुल्ला अरबले २७ रन बनाए।
नेपालका लागि बलिङमा सन्तोष यादवले सर्वाधिक ३ विकेट लिए। उनले १० ओभरमा १ मेडन सहित २३ रन खर्चिए। विपिन शर्मा र सिब्रिन श्रेष्ठले समान २–२ विकेट लिए। अभिषेक तिवारी र अपराजित पौडेलले १–१ विकेट लिए।
पहिलो खेलमा नेपाल अफगानिस्तानसँग १३० रनले पराजित भएको थियो। नेपालले तीन खेल सम्मेलित सिरिजको अन्तिम खेल चैत्र २७ गते खेल्नेछ।
