— भौतिक पूर्वाधार तथा यातायातमन्त्री देवेन्द्र दाहालले प्रहरीले पैसा खाएर मापदण्ड विपरीतका गाडी चलाउन दिँदा सार्वजनिक सम्पत्तिमा क्षति पुगिरहेको आरोप लगाएका छन्। उनले वायु प्रदूषण मापदण्ड कार्यान्वयनमा समेत प्रहरीबाट सहयोग नभएको आरोप लगाए।
केही दिनयता प्रदूषणका कारण वायु गुणस्तर कमजोर भएकोमा मन्त्री दाहालले सवारी साधनका कारण भइरहेको धुँवा प्रदूषण नियन्त्रणमा गृह मन्त्रालयको सहयोग नपाएको बताए।
सोमबार सिंहदरबारमा यातायात व्यवसायी राष्ट्रिय महासंघका प्रतिनिधिहरूसँग छलफल गर्दै मन्त्री दाहालले वायु प्रदूषण नियन्त्रणमा सरकारले अहिले तोकिएका मापदण्डहरूको कार्यान्वयन गर्ने प्रतिवद्धतासमेत जनाएका छन्।
'सरकारले विभिन्न मापदण्डहरू तोकेको छ। तर मापदण्ड विपरीतका गाडीहरू राजमार्गमा गुडिरहेकै छन्,' मन्त्री दाहालले भने, 'कतै धुँवा प्रदूषित पार्ने गाडी गुडेका छन् त कतै बढी तौल बोकेका गाडी कुदिरहेका छन्। यसमा प्रत्यक्ष निगरानी गर्ने र मापदण्ड कार्यान्वयन गराउने जिम्मेवारी भनेको प्रहरीको हो। तर प्रहरीबाट सहयोग मिलिरहेको छैन।'
मन्त्री दाहालले मालवाहक गाडीहरूको नापतौलबारे अध्ययन गर्न कार्यदल बनाएको र कार्यदलको प्रतिवेदनका आधारमा समस्या समाधान गरिने बताए। उनले मापदण्डविपरीत सञ्चालित गाडीहरूलाई रोक लगाएर सार्वजनिक सम्पत्तिमा भइरहेको क्षतिलाई रोक्नुपर्ने बताए।
'नेपाल प्रहरीबाट हामीलाई सहयोग भएन । यो विषयमा पनि हामीले गृह मन्त्रालयसँग नै बस्नुपर्ने भएको छ । किनभने जहिले पनि यस्तै विकृति हुने कुराले त देशलाई कुनै फाइदा पुग्दैन । पैसा खाएर ओभर लोडका गाडीहरू चलाउन दिने, मापदण्डविपरीतका सवारी चलाउन दिने कुराले सार्वजनिक सम्पत्ति नोक्शान भइरहेको छ । त्यसकारण यो विकृतिलाई हटाउनको लागि म लागिरहेको छु,' उनले भने।
