: अमेरिकी राष्ट्रपति डोनाल्ड ट्रम्पले चिनियाँ सामाजिक सञ्जाल एप टिकटक बेच्ने समयसीमा फेरि बढाएका छन्। उक्त निर्णयसँगै टिकटक बिक्री नगरी अमेरिकामा थप ७५ दिन चल्ने भएको छ।
अमेरिकामा टिकटक चल्न चीनले यो एप बेच्न अनिवार्य रहेको उनले बताएका छन्।
यसअघि राष्ट्रपति ट्रम्पले टिकटक बिक्रीको सम्झौता भएमा चिनियाँ आयातमा लगाइएको भन्सारमा पनि केही छुट दिन सक्ने बताएका थिए।
अमेरिकामा भने धेरै टिकटक प्रयोगकर्ता यो एप प्रतिबन्ध लगाउने निर्णयको विरुद्धमा छन्।
समाचार एजेन्सी रोयटर्सको रिपोर्ट अनुसार यस हप्ता ट्रम्पको ट्यारिफ घोषणापछि चीनले अमेरिकामा टिकटक बिक्री गर्न अनुमति नदिने संकेत गरेको छ।
अमेरिकी सिनेटमा ट्रम्पको विरोध गर्ने डेमोक्र्याटिक पार्टीका नेता चक शुमरले राष्ट्रपतिले करको मुद्दाबाट ध्यान हटाउन मात्र उक्त विषय निकालेको बताएका छन्।
आलोचकहरूले प्रायः टिकटकलाई अत्यधिक डेटा सङ्कलन गरेको आरोप लगाउँछन्। बीबीसी
