— मधेश प्रदेश मुख्यमन्त्री तथा मन्त्रिपरिषद्को कार्यालय अगाडि स्वास्थ्यकर्मीले धर्ना दिएका छन् । सोमबार सिनियर अहेब र अनमि पाँचौँ तह संघर्ष समितिले धर्ना दिएको हो ।
स्थानीय सेवा गठन तथा सञ्चालन ऐनमा त्रुटि रहेको भन्दै तीन बुँदे संशोधनको माग गर्दै आएका छन् । स्वास्थ्य सेवामा प्रथम विन्दु चौथो तह भएकोले खुल्लाबाट शतप्रतिशत पदपूर्ति हुनुपर्ने, स्थानीय सेवासम्बन्धी ऐनको दफा-२ सच्याउनुपर्ने र विगतदेखि पाउँदै आएको दुई तह स्तरवृद्धि पाउनुपर्ने माग गर्दै धर्ना दिएको संघर्ष समितिको माग पत्रमा उल्लेख रहेको छ ।
स्थानीय तहमा खटेका मधेश प्रदेशका अहेब र अनमि स्वास्थ्यकर्मी सरकारलाई ध्यानाकर्षण गराउँदा पनि माग सम्बोधन नगरेपछि बाध्य भएर संघर्षको कार्यक्रम अगाडि सारेको पत्रमार्फत जनाएको छ । मधेश प्रदेश सरकारको प्रदेश राजपत्रमा गत भदौ ७ गते उक्त ऐन प्रकाशित भएको थियो ।
