: आठबिसकोट नगरपालिका–१२ ठुलीबार्खुमा अवैध रुपमा लगाइएको अफिमका बोटहरू नष्ट गरिएको छ। जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक ऋषि पाठकका अनुसार ठुलीबार्खुका आठ स्थानमा फैलिएको करिब पाँच रोपनी क्षेत्रफलमा अवैध रूपमा रोपिएको अफिम खेती नष्ट गरिएको हो।
फूल फुलेको अवस्थामा रहेका अफिमका बोटहरू नष्ट गरेको प्रहरीले जनाएको छ। ती बोटहरू गहुँखेतीको बीचमा र पाखो बारीमा गोप्य तरिकाले लगाइएको पाइएको छ।
प्रहरीका अनुसार पछिल्लो समय जिल्लाका विभिन्न स्थानमा अवैध अफिम खेती बढ्न थालेपछि नियन्त्रणका लागि नियमित निगरानी र फडानी अभियान सञ्चालन गरिएको छ।
