: दर्ता बिना हजमा भाग लिने मानिसको संख्या कम गर्न साउदी अरबले भारत र पाकिस्तानसहित १४ देशका मानिसको भिसामा अस्थायी प्रतिबन्ध लगाएको छ। उमराह, व्यापार र पारिवारिक भ्रमणका लागि जुनको मध्यसम्म भिसा प्रतिबन्धित रहने जनाइएको छ।


साउदीले भारत, पाकिस्तान, बंगलादेश, मिस्र, इन्डोनेसिया, इराक, नाइजेरिया, जोर्डन, अल्जेरिया, सुडान, इथियोपिया, ट्युनिसिया, यमन र मोरक्कोको भिसामा अस्थायी प्रतिबन्ध लगाएको हो।


साउदी अधिकारीहरूले उमरा भिसा भएकाहरू अप्रिल १३ सम्म साउदी अरेबिया पुग्न सक्ने बताएका छन्। यस वर्ष हज यात्रा जुन ४ देखि ९ सम्म हुनेछ।


रिपोर्टका अनुसार यात्रुहरूलाई नयाँ नियमहरू पालना गर्न भनिएको छ। यदि कुनै व्यक्तिले यो आदेश उल्लङ्घन गरेमा सो व्यक्तिलाई आगामी ५ वर्ष साउदी प्रवेशमा रोक लगाइने छ।

धेरै विदेशी नागरिक उमरा वा भ्रमण भिसामा साउदी अरेबिया आउने गरेको रिपोर्टहरुमा उल्लेख छ। भिसा सकिएपछि पनि उनीहरू अवैध रूपमा साउदी अरबमा बसिरहेका छन्। साथै उनीहरु दर्ता बिना नै हज यात्रामा भाग लिन जान्छन्। यसलाई रोक्न साउदी सरकारले यो निर्णय गरेको हो।

दर्ता बिना हज यात्रा हुने भएकाले अधिकारीहरू तीर्थयात्रीहरूको संख्या अनुमान गर्न असमर्थ भएका जनाएका छन् । यसले गर्दा अचानक भीड बढ्ने र गर्मी पनि बढ्ने भएकोले यसो गरिएको जनाइएको छ।

साउदीमा अवैध रूपमा काम गर्ने विदेशीको संख्या बढ्ने

अधिकारीहरूले अवैध काम पनि भिसा प्रतिबन्ध लगाउने अर्को प्रमुख कारण भएको बताएका छन्। केही विदेशी नागरिकहरूले साउदी अरेबियामा व्यापार वा पारिवारिक भिसा प्रयोग गरेर अवैध रूपमा काम गरिरहेका उनीहरूले जनाएका छन्। भिसा नियमहरू उल्लङ्घन गरेको र श्रम बजारमा असंतुलन सिर्जना गरेको उनीहरूको आरोप छ।

२०२४ मा अत्याधिक भीडका कारण १,२०० तीर्थयात्रीको मृत्यु

२०२४ मा हज यात्रा जुन १४ देखि जुन २९ सम्म तय गरिएको थियो। हज यात्राको क्रममा ठूलो संख्यामा तीर्थयात्रीहरूको आगमनका कारण गर्मीको असर बढेको थियो।

यसका कारण पोहोर कम्तीमा १,२०० तीर्थयात्रीको मृत्यु भएको जनाइएको छ।