— राप्रपाका पूर्वअध्यक्ष एवं वरिष्ठ नेता पशुपतिशमशेर राणाले प्रजातन्त्रमा प्रदर्शन गर्न पाइने अधिकारलाई अहिले नियन्त्रणको प्रयास भइरहेको बताएका छन् ।
पार्टीले मंगलबार बल्खुमा आयोजना गरेको खबरदारी सभामा उनले शान्तिपूर्ण प्रदर्शनमा आफ्ना कुरा राखिएरहेका राप्रपाका रवीन्द्र मिश्र र धवल शमेशर राणालाई पक्राउ गरेर राज्यविरुद्धको अपराधमा जेलमा राख्ने प्रयास गरिएको भन्दै त्यसप्रति आपत्ति जनाए ।
उनले थुनामा राखिएका आफ्ना पार्टीका नेता र कार्यकर्तालाई तुरुन्त रिहाईको माग गरे । सरकारलाई मन नपरेको कुरा बोलेपछि थुन्ने व्यवहार गरिएको उनको भनाइ थियो । ९४ प्रतिशत सनातन रहेको देशमा हिन्दू राष्ट्र हुनुपर्नेमा अन्यायपूर्ण ढंगले धर्मनिरपेक्ष घोषणा गरिएको राणाको भनाइ छ । २०४६ सालको राजनीतिक सहमतिविपरीत देशलाई गणतन्त्र र धर्मनिरपेक्ष गरिएकोमा राप्रपाले त्यसको विरोध गरेको उनले बताए । उनले राजा र राजनीतिक दलबीच भएको सहमतिलाई उल्ट्याउने कार्य भएको आरोप लगाए ।
मुलुक कुशासन, भ्रष्टाचारले ग्रस्त बनेको उनले आरोप लगाए । मुलुकलाई सुशासन र इमान्दारिता चाहिएको भन्दै त्यसका लागि नेतृत्व पनि दक्ष नेतृत्वको आवश्यकता रहेको उनको भनाइ थियो । चैत १५ गते तीनकुनेमा भएको घटनाको निष्पक्ष छानबिन हुनुपर्ने उनले माग दोहोर्याए ।
