— उपप्रधानमन्त्री तथा सहरी विकास मन्त्री प्रकाशमान सिंहले कोशी प्रदेश सरकारले घोषणा गरेको पर्यटन वर्षले नेपालको अर्थतन्त्रलाई महत्वपूर्ण टेवा पुर्याउने बताएका छन् ।
बुधबार तेह्रथुमको तीनजुरे मिल्केमा कोशी पर्यटन वर्ष-२०८२ को उद्घाटन गर्दै उनले पर्यटनको माध्यमबाट कोशी प्रदेशले समृद्धि र विकास क्षेत्रमा प्रशंसनीय काम गरेको उल्लेख गरे।
उपप्रधानमन्त्री सिंहले कोशी प्रदेशमा पर्यटनको प्रचुर सम्भावना रहेको बताउँदै, विशेषगरी भारतबाट पर्यटक भित्र्याउन सक्ने अवसरतर्फ प्रदेश सरकारले विशेष ध्यान दिनुपर्नेमा जोड दिए। उनले पर्यटन क्षेत्रको विकासले देशमा बढ्दै गएको आर्थिक शिथिलता कम गर्न र नेपालको समग्र समृद्धिमा योगदान पुर्याउन सक्ने विश्वास व्यक्त गरे।
उपप्रधानमन्त्री सिंहले मुलुक संघीयतामा गएपछि आम नागरिकको जीवनस्तरमा सुधार आएको दाबी गर्दै, २०४६ साल यताका विकासका तथ्य तथ्याङ्क हेर्न सुझाव दिए। उनले कतिपय व्यक्ति तथा समूहले विकास नै नभएको भन्ने भाष्य सिर्जना गरेर नकारात्मकता फैलाउने प्रयत्न गरेको भन्दै आपत्ति जनाए।
साथै, उनले आग्रह र पूर्वाग्रहभन्दा तथ्यमा आधारित भएर विकास निर्माण र त्यसबाट भएको प्रभावलाई हेर्नुपर्नेमा जोड दिए।
