— सिरहामा मोटरसाइकल दुर्घटनामा परी दुई जनाको ज्यान गएको छ । धनगढीमाई नगरपालिका ७, कसहास्थित पूर्वपश्चिम राजमार्गमा बुधबार बिहान मोटरसाइकल दुर्घटनामा दुई जनाको मृत्यु भएको हो ।
सुखीपुर नगरपालिका ८ का करिब ३० वर्षीय जयकुमार गिरी र कल्याणपुर नगरपालिका १२ का करिब २८ वर्षीय सन्तोषकुमार यादवको मृत्यु भएको प्रहरीले जनाएको छ । दुर्घटनामा गम्भीर घाइते भएका उनीहरुको स्थानीय अस्पतालमा उपचारको क्रममा मृत्यु भएको हो ।
यसैगरी, सन्तोषले चलाएको मोटरसाइकलमा पछाडी सवार सिरहा नगरपालिका १२ का करिब २४ वर्षीय सिकन्दर यादवको टाउको, हात खुट्टामा गम्भीर चोट लागेको छ । उनको उपचार भइरहेको सिरहाका प्रहरी प्रवक्ता डीएसपी वीरेन्द्र कुमार पासवानले बताए ।
पश्चिम दिशाबाट आउँदै गरेको गिरीले चलाएको बा ४४ प १५६१ नम्बरको माटरसाइकल र पूर्वबाट आउँदै गरेको सन्तोषले चलाएको स ५ प ७७४० नम्बरको मोटरसाइकल तीव्र गतिका कारण आपसमा ठोकिएको थियो ।
