— गाजा सिटीको पूर्वी भागमा रहेको एक आवासीय भवनमा इजरायली हवाई आक्रमण हुँदा कम्तीमा २९ जना प्यालेस्टिनीको मृत्यु भएको छ । आक्रमणमा परी कम्तीमा ४० जना घाइते भएको विभिन्न सञ्चार माध्यमहरूले जनाएका छन् । स्थानीय अस्पतालका अनुसार मंगलबार बिहान अल–हवासी मस्जिदनजिकै शेजैया बस्तीमा आक्रमण गरिएको थियो ।
हमासद्वारा सञ्चालित नागरिक सुरक्षा निकायका अनुसार युद्धक विमानले यो क्षेत्रलाई निसाना बनाएको थियो । उद्धारकर्मीहरूले अझै पनि भग्नावशेषबाट शव खोजिरहेका छन् ।
इजरायली सेनाले भने आक्रमणको योजना बनाउने ‘वरिष्ठ हमास आतंककारी’लाई निसाना बनाइएको बताएका छन् । सेनाले आक्रमण गर्दा नागरिकहरूलाई क्षति नपुगोस् भनेर विशेष सावधानी अपनाइएको र ‘सटीक हतियार’ प्रयोग गरिएको पनि इजरायलको दाबी छ ।
साथै इजरायली सेनाले हमासलाई नागरिकहरूलाई मानव ढालका रूपमा प्रयोग गरेर अन्तर्राष्ट्रिय कानुनको उल्लंघन गरेको आरोप पनि लगाएको छ । प्रत्यक्षदर्शीका अनुसार घटनास्थल निकै खचाखच थियो । ‘टेन्ट, विस्थापित मानिसहरूले त्यो ठाउँ निकै खचाखच थियो । एकैपटक धेरै मिसाइलले हानिएको थियो, सार्पनेलका टुक्राहरू चारैतिर उडेको थियो, धूलो, ध्वंस र चिच्याहट मात्र सुनिन्थ्यो । साँच्चै एक नरसंहार जस्तै लागेको थियो,’ घटनास्थलमा रहेका २६ वर्षीय आयुब सलिमले एएफपी समाचार संस्थालाई बताएका छन् ।
इजरायली सेनाले यसअघि नै यो क्षेत्र खाली गर्न भनेको थियो, जसकारण शेजैयाका हजारौं बासिन्दाहरू आफ्नो घर छोडेर भागिसकेका थिए ।
मंगलबार बिहान नै गाजाको हमास–नियन्त्रित स्वास्थ्य मन्त्रालयले पछिल्लो २४ घण्टामा मात्रै ३३ जना मारिएको जानकारी दिएको थियो । मार्च १८ देखि पुनः सुरु भएको इजरायली सैन्य आक्रमणमा हालसम्म १ हजार ४ सय ८२ जना मारिएको विभिन्न सञ्चारमाध्यमहरूले बताएका छन् ।
पछिल्लो तीन सातामा मात्रै ३ लाख ९० हजार मानिस विस्थापित भएका छन् । संयुक्त राष्ट्रसंघका अनुसार गाजाको दुईतिहाइ भूभाग अब ‘नो–गो जोन’ घोषित गरेर र खाली गर्न भनिएको छ ।
त्यस्तै इजरायलले खाना, औषधि र इन्धनको आपूर्ति रोकिदिएको कारणले अहिले गाजामा गम्भीर संकट उत्पन्न भएको छ । यसले मानवीय संकट पनि बढाएको संयुक्त राष्ट्रसंघले बताएको छ ।
संयुक्त राष्ट्रसंघका महासचिव एन्टोनियो गुटेरेसले गाजा हाल मृत्यु क्षेत्रजस्तै भएको बताएका छन् । उनले इजरायली नाकाबन्दीलाई अन्तर्राष्ट्रिय कानुनको उल्लंघन भएको समेत बताएका छन् ।
तर इजरायली विदेश मन्त्रालयले गुटेरेसको भनाइ अस्वीकार गर्दै गाजामा मानवीय सहायता नरोकिएको बताएको छ । ‘युद्धविरामको ४२ दिनमा २५ हजारभन्दा बढी सहायता गाडी गाजामा प्रवेश गरेका छन् । तर हमासले ती सहायता वस्तुहरू आफ्ना युद्ध तयारीमा प्रयोग गरिरहेको छ,’ इजरायलले आरोप लगाएको छ ।
इजरायली सेनाले यो आक्रमण ७ अक्टोबर २०२३ मा हमासले इजरायलमा गरेको आक्रमणपछि सुरु गरेको हो । आक्रमणमा करिब १ हजार २ सय जनाको मृत्यु भएको थियो भने २ सय ५१ जनालाई बन्धक बनाइएको थियो ।
