: डेनमार्कका लागि नवनियुक्त नेपाली राजदूत सुम्निमा तुलाधरले डेनमार्कका राजा फ्रेडरिक आन्द्रे हेनरिक क्रिस्टियन (फ्रेडरिक दशौँ) समक्ष आफ्नो ओहदाको प्रमाणपत्र पेश गरेकी छन्। कोपनहेगनस्थित क्रिस्टियान्सबोर्ग प्यालेसमा एक विशेष समारोहका बीच आफ्नो ओहदाको प्रमाणपत्र प्रस्तुत गरेपछि डेनिस राजाले पदबहालीको अवसरमा बधाई दिँदै राजदूत तुलाधरलाई कार्यकाल सफलताको शुभेच्छा व्यक्त गरे ।
समारोहपश्चातको शिष्टाचार भेटका क्रममा राजदूत तुलाधरले नेपालका राष्ट्रपति रामचन्द्र पौडेल, प्रधानमन्त्री के.पी. शर्मा ओली र नेपाली जनताको तर्फबाट डेनिस राजालाई सुस्वास्थ्य, दीर्घायूको कामना गर्दै डेनिस जनताको उन्नति, समृद्धि र कल्याणको शुभकामना व्यक्त गरिन् ।
नेपाल र डेनमार्कबीचको द्विपक्षीय सम्बन्धका विविध पक्षहरूबारे गहन छलफल भएको शिष्टाचार भेटका क्रममा द्विपक्षीय सम्बन्धलाई अझ प्रगाढ बनाउने विषयमा जोड दिइएको थियो । सो अवसरमा डेनिस राजा फ्रेडेरिकले आफू युवराज हुँदा सन् २०१५ मा नेपाल भ्रमण गरेको सम्झना गरे । विनाशकारी भूकम्पपछिको राहत कार्यक्रमको अवलोकन गर्दै त्यतिखेर उनले पश्चिम नेपालको भ्रमण गरेका थिए।
भेटवार्ताका क्रममा डेनिस राजा फ्रेडरिकले जलवायु परिवर्तन र यसले हिमाली क्षेत्रहरूमा पारेको नकारात्मक प्रभावप्रति चिन्ता व्यक्त गर्दा राजदूत तुलाधरले हिमाल पग्लिने दर र हिमश्रृङ्खलामा यसको असरमाथि केन्द्रित रहेर नेपालमा आयोजना हुने अन्तर्राष्ट्रिय फोरम ‘सगरमाथा संवाद (एभरेस्ट डाइलग)' बारे जानकारी गराइन् ।
समारोहमा डेनिस राजपरिवारका सदस्यहरू, राजदूत तुलाधरका श्रीमान मानव अधिकारकर्मी गौरी प्रधान तथा दूतावासका कूटनीतिक कर्मचारीहरू लगायतको सहभागिता रहेको थियो।
