: इजिप्टका स्टार फर्वाह मोहम्मद सलाहले लिभरपुलसँगको सम्झौता नवीकरण गरेका छन्। उनले लिभरपुलसँग २ वर्षको सम्झौता नवीकरण गरेका हुन्। उनको पछिल्लो सम्झौता समरमा सकिएपश्चात उनी लिभरपुलमा बस्ने नबस्ने कुराले निकै चर्चा कमाएको थियो। उनी साउदी अरब जाने हल्लाबीच उनले लिभरपुलसँगको सम्झौता नवीकरण गरेका हुन्।
३२ वर्षीय सलाहले लिभरपुलका लागि ३९४ खेल खेल्दै २४३ गोल र १०९ असिस्ट गरेका छन्। उनले लिभरपुलसँगको सम्झौता नवीकरण गरिसकेपछि पत्रकारसँग बोल्दै भने, ‘म निकै उत्साहित छु। हामीसँग एक उत्कृष्ट टिम रहेको छ। पहिला पनि उत्कृष्ट टिम रहेको थियो। मैले यहाँ सम्झौता नवीकरण गर्नुको कारण हामी अझै पनि उपाधि जित्न सक्छौं भन्ने लागेर हो। म यहाँ मेरो फुटबल करिअरको मजा लिइरहेको छु। मैले यहाँ ८ वर्ष खेलें। आशा छ, अब १० वर्ष हुनेछ।’
उनले लिभरपुलमा रहेर आफूले फुटबलको करिअरको उत्कृष्ट समय बिताइरहेको बताएका छन्। उनले यो सिजन लिभरपुलका लागि ३२ गोल गरेका छन्। जसमा २७ प्रिमियर लिगमा गरेका छन्। लिभरपुल हाल प्रिमियर लिगको २० औं उपाधिको दौडमा रहेको छ।
२०१७ मा लिभरपुलमा आबद्ध भएका सलाहले यो टिमसँग रहेर च्याम्पियन्स लिग, प्रिमियर लिग, एफए कप, लिग कप र फिफा क्लब विश्वकप जितेका छन्।
