— 'कुलिङ अफ पिरियड'को विषयमा भएको चलखेलबारे नेकपा एमालेले प्रतिनिधिसभा अन्तर्गतको राज्य व्यवस्था तथा सुशासन समिति सभापति रामहरि खतिवडा र समिति सचिव सुरजकुमार दुराको राजीनामा माग गरेको छ।
समितिको बुधबारको बैठकमा बोल्दै नेकपा एमालेका सांसद पदम गिरीले नैतिकताको आधारमा समिति सभापति र सचिवले अब नेतृत्व लिन नमिल्ने बताए। उनले निजामती सेवा विधेयकलाई महिनौँ लगाएर समितिले गम्भीर छलफल गर्दै पारित गरेको अवस्थामा त्यसमा जालझेल हुनु संसद्प्रतिको अपमान भएको टिप्पणी गरे।
उनका अनुसार समितिले स्पष्ट रूपमा कुनै पनि निजामती कर्मचारी सेवा निवृत्त भएपछि वा अवकाश लिएपछि दुई वर्षसम्म कुलिङ पिरियड रहने व्यवस्था सर्वसम्मत रूपमा पारित गरेको थियो। तर अन्तिम प्रतिवेदनमा त्यो व्यवस्था फेरिएको छ। उनले सभापति र सचिवले अरू मन्त्रालयहरूले जे ल्याए त्यसैमा हस्ताक्षर गरेर पठाएको गैर जिम्मेवार तर्क दिन नहुने बताए।
सांसद गिरीले भने, 'निजामती कर्मचारी विधेयकको सन्दर्भमा समितिले जसरी महिनौँ लगाएर गम्भीरताका साथ छलफल गरेको थियो, विशेष गरी कुलिङ पिरियडका सन्दर्भमा सेवा निवृत्त वा अवकाश प्राप्त कर्मचारीका लागि दुई वर्षको कुलिङ पिरियड रहने व्यवस्था एकमतले पारित गरिएको थियो। तर समितिकै प्रतिवेदनमा फरक ढंगले प्रस्तुत भयो। सिङ्गो समितिलाई गुम राहमा राख्ने काम भयो। सार्वभौम संसद्को समितिलाई यसरी उपहास गरिनु नेपालको इतिहासमै लज्जाजनक, घृणित अवस्था हो।'
उनले थपे, 'समितिले गरेका निर्णय जस्ताका तस्तै पठाउने दायित्व सभापति र सचिवको हो। अन्य मन्त्रालयबाट जे आयो त्यसैलाई सही गरेर पठाइएको भनाइ गैर जिम्मेवार हो। नैतिकताको हिसाबले सभापति र सचिवज्यूले यो समितिको नेतृत्व लिन मिल्दैन।'
सांसद गिरीले दोषीलाई कारबाहीको विषय बनाउनुपर्ने माग राखे।
