— एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले आफू भ्रष्टाचारजन्य कार्यमा संलग्न नरहेको दाबी गरेका छन् ।
पतन्जलिको जग्गा प्रकरणमा संलग्नता रहेको भनेर अख्तियार दुरुपयोग अनुसन्धान आयोगले दायर गरेको मुद्दामा विशेष अदालतबाट ३५ लाख धरौटीमा छुटेका नेपालले आफूले कुनै भ्रष्टाचारजन्य कार्य नगरेको बताएका हुन् ।
नेपालले नबिराउनु, नडराउनु मान्यता बोकेको बताउँदै अहिले डराएर हिँड्नुपर्ने अवस्था नरहेको बताए । पार्टी केन्द्रिय कार्यालयमा शुक्रबार आयोजित कार्यक्रमलाई सम्बोधन गर्दै उनले कुनै पनि संलग्नता नराखेकोले नडराएको बताए ।
आफू सधैँ अनुशासन, नियम, विधिको पालना गर्ने, प्रक्रियालाई सम्मान गर्ने व्यक्ति भएको भन्दै नेपालले एक व्यक्तिले पनि प्रमाण पेस गरे बलिदान दिन तयार रहेको बताएका हुन् । ‘मेरो एउटा मान्यता छ नबिराउनु, नडराउनु । बिराएको छैन भने डराउनुपर्ने कुनै आवश्यकता छैन । यस धर्तीका एक जना मान्छेले पनि माधव नेपालले भ्रष्टाचार गरेको छ भनेर तथ्य प्रमाण प्रस्तुत गरोस्, जुनसुकै बलिदान गर्न म तयार हुनेछु,' नेपालले भने, 'म अनुचित कुराको कहिल्यै पनि पक्षमा रहन्नँ । म जहिले पनि अनुशासन, नियम, विधिको पालना गर्ने, प्रक्रियालाई सम्मान गर्ने, राम्रो संस्कृति र संस्कारमा जोड दिने, कहिले पनि बदलाको भावनाबाट नहिँड्ने सकेसम्म सबैलाई समेटेर लैजाने सोच भएको मान्छे हुँ ।’
अध्यक्ष नेपालले सरकारले जनभावनालाई बुझ्न र जनचाहनाको सम्मान गर्न नसकेको पनि बताए । उनले सरकारले जनताको विश्वास पनि जित्न नसक्ने र जनचाहना बमोजिम परिणाम दिने कुनै पनि अवस्था नरहेको बताए । वर्तमान सरकार जनमुखी नभई जनविरोधी, सुशासनको नभइ कुशासनको पक्षपोषक रहेको आरोप लगाए ।
‘अहिले हाम्रो देशको राजनीतिक अवस्थालाई चर्चा गर्ने हो भने सरकारले मुलुकलाई राम्रोसँग हाँक्न सकेको छैन । जनभावनालाई बुझ्न सकेको छैन । जनचाहनालाई सम्मान गर्न सकेको छैन । सही नीति अवलम्बन गर्न सकेको छैन । जनताका पीडा, वेदनालाई सम्बोधन गर्न पनि सकेको छैन,' उनले भने, 'त्यसो हुनाले यो सरकारले जनताको विश्वास पनि जित्न सक्दैन, जनचाहना बमोजिम परिणाम दिने कुनै पनि अवस्था छैन । यो सरकार जनमुखी होइन, जनविरोधी हो । यसको पतन अनिवार्य छ । खालि हामीले समय पर्खिनुपर्ने हुन्छ । आत्तिनुपर्ने केही आवश्यकता छैन ।’
