— बाँकेमा नेपाली सेनाको परिचयपत्र बोकेका एक युवकलाई प्रहरीले १० ग्रामभन्दा बढी लागूऔषध ब्राउनसुगरसहित पक्राउ गरेको छ ।
जिल्ला प्रहरी कार्यालय बाँकेका प्रहरी प्रवक्ता प्रहरी नायब उपरीक्षक दीपक पातलीले बैजनाथ गाउँपालिका-२ घर भएर सेनामा कार्यरत रहेको परिचयपत्र राखेका २६ वर्षीय सन्जु आलेलाई १० ग्राम ६२० मिलिग्राम ब्राउनसुगरसहित नियन्त्रणमा लिइएको हो ।
उनले पक्राउ परेका आलेको परिचयपत्र नक्कली हो कि सक्कली हो भन्ने बारेमा समेत अनुसन्धान भइरहेको बताए । सेनाको परिचयपत्र बोकेका आलेलाई बैजनाथ गाउँपालिकास्थित घरबाट नियन्त्रणमा लिएको प्रहरीले जनाएको छ ।
लागूऔषध नियन्त्रण ब्युरो शाखा कार्यालय नेपालगन्ज र इलाका प्रहरी कार्यालय वनकटुवाबाट खटिएको संयुक्त टोलीले विशेष सूचनाको आधारमा सन्जुलाई पक्राउ गरेको जिल्ला प्रहरी कार्यालय बाँकेले जनाएको छ ।
प्रहरीका अनुसार सन्जुको घरमा लागूऔषध लुकाइएको विशेष सूचनाका आधारमा खटिएको टोलीले जाँच गर्ने क्रममा घरभित्र रहेको जाँडको ड्रमभित्र लुकाइछिपाइ राखेको १० ग्राम ६२० मिलिग्राम ब्राउन सुगर फेला परेको थियो । पक्राउ परेका आलेलाई थप अनुसन्धान तथा आवश्यक कानुनी प्रक्रिया अघि बढाउन इलाका प्रहरी कार्यालय कोहलपुरमा राखिएको जिल्ला प्रहरी कार्यालय बाँकेका प्रमुख प्रहरी उपरीक्षक रामप्रसाद घर्तिमगरले बताए ।
