: बनेपा–सिन्धुली–बर्दिबास (बीपी) राजमार्गमा थप एक महिनासम्म रातिको समयमा यात्रुबाहक सवारी सञ्चालनमा रोक लगाइएको छ।
यही असार ६ गते शुक्रबारबाट असार २० गते सम्म १५ दिनका लागि बीपी राजमार्गको सिन्धुलीको खुर्कोटबाट काभ्रेको काभ्रे भन्ज्याङ खण्डमा राति साँढे ६ बजेबाट बिहान ५ बजेसम्म यात्रुबाहक सवारी सञ्चालनमा रोक लगाइएको थियो।
मनसुनजन्य विपद्का घटनालाई मध्यनजर गर्दै थप एक महिनासम्म उक्त राजमार्गमा रातिको समयमा सवारी सञ्चालनमा रोक लगाउने निर्णय गरिएको जिल्ला प्रशासन कार्यालय सिन्धुलीका प्रशासकीय अधिकृत प्रविन कटवालले जानकारी दिए।
गत असार ६ गते शुक्रबार सिन्धुली जिल्लाको खुर्कोटमा बसेको सिन्धुली, काभ्रे र रामेछाप जिल्लाको सुरक्षा समन्वय समितिको संयुक्त बैठकले बाढी पहिरोको जोखिमलाई मध्यनजर गर्दै यस्तो निर्णय गरेको थियो।
सोही निर्णयका आधारमा अन्तर जिल्ला सुरक्षा निकायसँगको समन्वयमा थप एक महिना निषेधको अवधि बढाइएको कटवालको भनाइ छ। बीपी राजमार्ग भई सञ्चालन हुने सवारीलाई सिन्धुलीको खुर्कोट र काभ्रेको काभ्रे भञ्ज्याङमा रोकिने गरिएको छ। खुर्कोट–काभ्रेभन्ञ्याङ खण्डमा राति साँढे ६ बजेबाट बिहान ५ बजेसम्म यात्रुबाहक सवारी सञ्चालन गर्न पाइने छैन।
सिन्धुलीको खुर्कोट देखि काभ्रेको काभ्रेभञ्ज्याङ खण्डलाई बाढी र पहिरोको दृष्टिकोणले अति जोखिमपूर्ण मानिएको छ। रातिको समयमा सिन्धुलीबाट काभ्रे तर्फ जाने सवारीलाई सिन्धुलीको खुर्कोट र काठमाडौंबाट काभ्रे हुँदै सिन्धुली तर्फ आउने सवारीलाई काभ्रेको काभ्रेभन्ञ्याङमा प्रहरीले रोक्ने छ।
यस अघि बीपी राजमार्ग अन्तरगत भिमान र काभ्रेको काभ्रे भन्ञ्याङमा रातिको समयमा सार्वजनिक यातायातका साधनलाई रोक लगाउँदै आइएको थियो। रातिको समयमा आपत्कालीन यात्रा गराउनु परे सुरक्षा निकायसँगको समन्वयमा मात्र सवारी साधन सञ्चालन गरिने छ। बीपी राजमार्ग हुँदै पूर्वी नेपाल तथा मध्य तराईका जिल्लाका साथै सिन्धुली, रामेछाप, दोलखा, काभ्रे, ओखलढुंगा लगायतका जिल्लासम्म सवारी साधनहरू आवतजावत गर्ने गर्छन्। गत असोज ११ र १२ गते रोशी र सुनकोशी नदीमा आएको बाढीका कारण बीपी राजमार्गको नेपालथोक–भकुण्डेबेशी खण्ड तहसनहस भएको छ।
उक्त खण्डमा अस्थायी डाइभर्सन बनाएर यातायातका साधन सञ्चालनमा ल्याइएको भएपनि केही दिनदेखि लगातार पर्दै आएको पानीका कारण आउने बाढिपहिरोले अबरुद्ध हुँदै आएको छ। रोशी खोलामा आउने बाढीले काभ्रेको माम्ती, चौकीडाँडा, मंगलटार लगायतका क्षेत्रमा क्षति पुर्याएको छ। यसैगरी नमोबुद्धिस्थत चौकीडाँडाबाट रोशी गाउँपालिकाको कालढुंगासम्म १२ किलोमिटर सडकखण्डमध्ये आठ किलोमिटर सडकमा पूर्ण रूपमा क्षति पुगेको छ। यस्तै सिन्धुलीको नेपालथोकदेखि आँपघारीसम्मको सडक क्षति भएको छ।
रोशीलाई तर्काएर तिरैतिर अस्थायी रूपमा डाइभर्सन निर्माण गरेर एकतर्फी यातायातका साधनहरू सञ्चालनमा ल्याइएको भएपनि बाढी र पहिरोले जति बेला पनि अवरुद्ध हुन सक्ने जोखिम छ।
