— जिल्लाको भोटेकोसी गाउँपालिका–२ स्थित कोदारी (इको)मा सडक भासिँदा ठप्प कोदारी राजमार्ग शनिबारदेखि सञ्चालनमा आएको छ ।
चीन जोड्ने अन्तर्राष्ट्रिय कोदारी राजमार्ग (२६ किलोमिटर) को कोदारीमा आइतबार सडक भासिएको थियो । राजमार्ग पूर्ण रूपमा अवरुद्ध बनेसँगै भन्सार प्रक्रियाका लागि चीनबाट सामान बोकेर छुटेका दर्जनौँ कन्टेनर लिपिङमा रोकिएका थिए । 'शनिबार पाँच नबज्दै सडक सञ्चालनमा आएको छ, नाका नियमित अवस्थामा फर्किएको छ,' चरिकोट सडक डिभिजन कार्यालयका प्रमुख अमित श्रेष्ठले भने ।
नाका चलेसँगै उता रोकिएका कन्टेनर लार्चास्थित भन्सारका लागि हिँडेका छन् । आइतबारदेखि पहिरोको अवरोध हटाउँदै मर्मतसम्भार गरेर पूर्ण रुपमा सडक खुला गरिएको उनले जनाए ।
यसअघि यही स्थान, खकुण्डोल र कोप्लाङको अवरुद्ध हटाएर सडक सहज बनाइएको थियो, जसमा दुई एक्स्काभेटर प्रयोग गरिएको थियो । हाल लार्चामा बेलिब्रिज जोडिएको छ । कोप्लाङ क्षेत्रमा करिब १५ फिट सडक भास्सिएपछि नाका बन्द भएको थियो ।
यो वर्षको बर्खायाममा यो तेस्रो पटक नाका पूर्णरूपमा अवरुद्ध भएको हो । तातोपानी नाका विगतदेखि नै प्राकृतिक प्रकोपले बारम्बार प्रभावित हुँदै आएको छ । यद्यपि, हाललाई वैकल्पिक व्यवस्थाको अभावले यात्रु र व्यवसायीलाई असहज हुने गरेको छ ।
