— भोजपुरको रामप्रसादराई गाउँपालिका–२ मा एकै परिवारका चार जनाको हत्या भएको छ । भोजपुर नगरपालिका–२ हेलौंछा घर भएका राजेन्द्र राईले श्रीमतीसहित ससुराली घरका चार जनाको हत्या गरेको भोजपुरका प्रमुख जिल्ला अधिकारी सुरेश पन्थीले बताए ।
राईले माइतीघरमा रहेकी श्रीमती मनिषा गिरी, ससुरा बेलबहादुर गिरी, सासु मञ्जु गिरी र सालो सपन गिरीको हत्या गरेको उनले बताए । घटना राति सवा १ बजेतिर भएको थियो ।
उनका अनुसार घटना संलग्न रहेका भनिएका राजेन्द्र पनि गम्भीर घाइते छन् । उनको पेटमा तीन ठाउँमा धारिलो हतियारको चोट लागेको छ । हत्यामा संलग्न राईलाई उपचारका लागि भोजपुर अस्पताल ल्याइएको थियो । उनको जिल्ला अस्पतालमा उपचार हुन नसकेपछि रेफर गरिएको छ ।
छिमेकीका अनुसार मनिषा केही दिनअघि माइती आएकी थिइन् । मनिषालाई लिन भनेर ससुराली पुगेका राजेन्द्र र माइतीबीच मनिषाको विषयमा विवाद भएको थियो ।
‘विवाद के थियो भन्ने खुलिसकेको छैन,’ प्रजिअ पन्थीले भने, ‘घटनास्थलमा चार जनाको शव फेला परेको छ । राजेन्द्र स्वयं पनि गम्भीर घाइते भएकाले धेरै कुरा खुल्न बाँकी छ’, उनले भने । घटनाका विषयमा थप अनुसन्धान भइरहेको प्रहरीले जनाएको छ ।
घटनाको जानकारी पाउने बित्तिकै ईप्रका बोयाङ र जिल्ला प्रहरी कार्यालयबाट टोली घटनास्थल पुगेको थियो । घटना सवा १ बजेतिर भएको भनिए पनि प्रहरी राति अबेर मात्र खबर आएको थियो ।
