— उपप्रधानमन्त्री तथा अर्थमन्त्री विष्णुप्रसाद पौडेलले पर्यटन क्षेत्र नेपालको समृद्धिको आधार भएको बताएका छन्।
शनिबार काठमाडौँमा आयोजित ‘अर्थतन्त्र डटकमको अर्थतन्त्र दशक जर्नल सार्वजनिक तथा पर्यटनमा बजेट प्राथमिकता, कार्यान्वयन र उपलब्धि’ विषयक अन्तरक्रिया कार्यक्रममा बोल्दै उनले समृद्धिका निम्ति थुप्रै क्षेत्र भए पनि पर्यटन एक महत्त्वपूर्ण क्षेत्र भएको उल्लेख गरेका छन्। नेपालमा पर्यटनको अनगिन्ती सम्भावना रहेको र त्यसलाई प्रवर्द्धन गर्न भित्री तथा बाह्य लगानी आवश्यक रहेको उनले बताए।
पर्यटन पूर्वाधार निर्माणमा निजी क्षेत्रको सहभागिता अपरिहार्य रहेको भन्दै उनले भने, 'समृद्धिका निम्ति हामीसँग अन्य विभिन्न विकल्पहरू छन्। तीमध्ये पर्यटन एक शक्तिशाली विकल्प हो। यसको अनगिन्ती सम्भावना छ। हामीले क्रमशः यस क्षेत्रमा लगानी प्रवर्द्धन गर्नुपर्छ। देशभित्रको लगानी मात्र होइन, विदेशी लगानी पनि आवश्यक छ। राज्यले पर्यटनलाई आकर्षक गन्तव्यका रूपमा सन्देश दिनुपर्छ, निजी क्षेत्रलाई लगानीका लागि आकर्षित गर्नुपर्छ।'
उनका अनुसार बजेट निर्माणका क्रममा पनि यही दृष्टिकोणलाई ध्यानमा राखिएको छ। साथै, उनले मुलुकमा राजनीतिक स्थायित्व कायम गर्दै विकास र समृद्धितर्फ अघि बढ्नुपर्नेमा पनि जोड दिएका छन्।
