: इजरायलको द्वन्द्वपछि इरानका सर्वोच्च नेता अयातोल्लाह अली खामेली पहिलोपटक सार्वजनिक कार्यक्रममा देखा परेका छन्। इरानको सरकारी सञ्चारमाध्यमका अनुसार शनिबार शिया मुस्लिमहरूको लागि सबैभन्दा महत्वपूर्ण दिन आशुराको पूर्वसन्ध्यामा मस्जिलमा उनी देखा परेका हुन्। त्यहाँ उनी पूजा गर्नेहरूलाई अभिवादन गरिरहेका थिए।
खामेनीले इजरायलको अस्तित्व समाप्त पार्नेबारे खुलेआम कुरा गर्दै आएका थिए। उनले लामो समयदेखि इजरायललाई पश्चिम एसियाली क्षेत्रमा ‘क्यान्सरयुक्त ट्युमर’ भन्दै आएका छन्। उनले यसलाई निश्चित रूपमा उखेल्नु आवश्यक रहेको बताउँदै आएका छन्।
इजरायलले जुन १३ मा इरानमाथि आक्रमण गरेको थियो। त्यसपछि इरानले पनि इजरायलमाथि आक्रमण गरेको थियो। यस द्वन्द्वका क्रममा इजरायली आक्रमणमा परी धेरै शीर्ष इरानी कमाण्डर र आणविक वैज्ञानिकहरू मारिएका छन्।
दुई देशबीचको १२ दिने द्वन्द्वका क्रममा खामेनी तीनवटा भिडियो सन्देशमा देखा परेका थिए। त्यो समयमा उनी बंकरमा लुकेको अनुमान गरिएको थियो।
