: हिज्बुल्लाहका महासचिव शेख नायी कासिमले इजरायलको अगाडि कहिल्यै नझुक्ने बताएका छन्। उनले इजरायलसँग सम्बन्ध सामान्यीकरण गर्नु भनेको शत्रुसँग सम्झौता गर्नु र अपमान गर्नु रहेको बताएका हुन्।
कासिमले भने,‘हामी यसको कब्जालाई वैध बनाउने प्रक्रियाको हिस्सा हुने छैनौँ। लेबनानका जनताले कहिल्यै इजरायलको अगाडि आत्मसमर्पण गर्नेछैनन् र यो अपमान सहन पनि सक्दैनन्।’
हिज्बुल्लाहको यो घोषणासँगै इजरायलसँग युद्धविराम गर्ने प्रयासमा ठुलो धक्का लाग्न सक्ने जनाइएको छ।
कासिमले इजरायलसँगको कुनै पनि प्रकारको सम्झौता प्यालेस्टिनी संघर्षका लागि विश्वासघात हुने बताए। उनले आफ्नो संगठनले इजरायलसँगको सम्बन्ध सामान्यीकरण गर्ने कुनै पनि प्रयासको विरोध गर्ने बताए। उनले यसलाई आत्मसमर्पण पनि भने।
कासिमले इजरायलसँगको कुनै पनि सम्झौता यसको कब्जाको वैधता स्वीकार गर्नु जस्तै हुने बताए। उनले हिज्बुल्लाहले कुनै पनि रूपमा मान्यता नदिने बताए।
