: नेपाली महिला फुटबल टिमकी कप्तान सावित्रा भण्डारीले एएफसी एसियन कप छनोटको फाइनल खेलमा उज्वेकिस्तानसँग दुर्भाग्यवश हार बेहोर्नुपरेको बताएकी छन्। एएफसी एसियन कप छनोट खेलेर स्वदेश फर्किएपछि त्रिभुवन अन्तर्राष्ट्रिय विमानस्थलमा बोल्दै उनले नेपाली महिला फुटबल टिमले आफूभन्दा बलियो प्रतिस्पर्धी उज्वेकिस्तानसँग राम्रो प्रदर्शन गरेको बताएकी हुन्।
उनले भनिन्,‘हामीले ३–१ ले पछि पर्दा जुन हिसाबले कमब्याक गर्यौ त्यसपछि ३–३ को अवस्था रहेको थियो। पछि दुर्भाग्यवश हामीले हार बेहोर्यौँ। समग्रमा हामीले सकारात्मक खेल्यौँ।’
कप्तान सावित्राले यस खालको प्रदर्शनले नेपाली महिला फुटबलको भविष्य उज्ज्वल रहेको बताइन्। प्रशिक्षक प्याट्रिक डे वाइल्डले पनि निकै सकारात्मक रुपमा टिमलाई लिएको उनले बताइन्। नेपाली महिला फुटबलमा प्याट्रिक डे वाइल्डको प्रशिक्षण रहिरहे र एन्फाले संरक्षण गरेर राख्न सके अझै राम्रो हुने उनले बताइन्।
एएफसी एसियन कप छनोटको फाइनल खेलमा उज्वेकिस्तानसँग पेनाल्टी सुटआउटमा पराजित भएपछि नेपाली महिला फुटबल टिमले आगामी वर्ष हुने एसियन कप खेल्ने अवसर गुमाएको हो।
नेपाल निर्धारित ९० मिनेटको समयमा ३–३ बराबरी खेल्दै पेनाल्टी सुटआउटमा ४–२ ले पराजित भएको हो। नेपालले समूह चरणको पहिलो खेलमा लाओसलाई ९–० र दोस्रो खेलमा श्रीलंकालाई ८–० ले पराजित गरेको थियो।
यस पटक नेपाली टिमको कप्तानीको जिम्मेवारी प्रशिक्षक प्याट्रिक डे वाइल्डले सावित्रा भण्डारीलाई दिएका थिए। टिमकी पूर्व कप्तान तथा नेपालकी पहिलो रोजाइकी गोलकिपर एञ्जिला तुम्बापो सुब्बाले भने यस पटक खेल्न पाइनन्। तीनै खेलमा अन्जना राना मगरले नेपालको पोष्ट सम्हालेकी थिइन्।
