: खानेपानी मन्त्री प्रदीप यादवले वीरगन्जमा देखिएको खानेपानीको संकट समाधानका लागि आफू लागिपरेको बताएका छन्। बुधबार वीरगन्जमा भएको छलफलमा उनले जनताले भोगिरहेको पानीको अभावले आफू चिन्तित रहेको बताएका हुन्।
मन्त्री यादवले वीरगन्जमा पानीको समस्या समाधान गरेरै छाड्ने प्रतिबद्धता व्यक्त गरे। उनले वीरगन्जसहित तराई–मधेसमा देखिएको खानेपानीको समस्या समाधान गर्न पहल गरिरहेको बताए।
मन्त्री यादवले जलवायु परिवर्तनका कारण तराई–मधेसमा परेको खडेरीले खानेपानीको समस्या देखिएको बताए। उनले भने,‘जनताको अत्यावश्यक आवश्यकताको रूपमा रहेको खानेपानीको समस्या समाधानमा कुनै कसर बाँकी राखिने छैन। सरकारको तर्फबाट तीव्र पहल भइरहेको छ।’
बुधबार बिहान मन्त्री यादवले खानेपानीको संकट भएका वीरगन्जका विभिन्न वडामा पुगेर स्थलगत निरीक्षण गरेका थिए।
