— भरतपुर महानगरपालिका–१५ रामपुरमा निर्माणाधीन गौतम बुद्ध अन्तर्राष्ट्रिय क्रिकेट रंगशालाको काम एक वर्षमा लगभग एक तिहाइ सकिएको निर्माण पक्षले जनाएको छ । धुर्मुस–सुन्तली फाउन्डेसनले सहयोग जुटाएर रंगशाला निर्माण थालेको थियो । तर सहयोग जुट्ने अवस्था नरहेको भन्दै फाउन्डेसन कामबाट अलग भएपछि भरतपुर महानगरपालिकाले स्वामित्व लिएर फेरि काम सुरु गरेको हो ।


महानगरले स्वामित्व लिएपछि गत वर्षको असार २३ गते निर्माण कम्पनीसँग ३० महिनाभित्र काम सक्ने गरेर सम्झौता भयो । सम्झौताको वर्ष दिन बित्दा भौतिक प्रगति ३२ प्रतिशत र वित्तीय प्रगति २६ प्रतिशत हाराहारीमा भएको निर्माण कम्पनीले जनाएको छ । रंगशालाको उत्तर र दक्षिणतर्फ दुईटा टावर रहने छन् । उत्तरतिरको टावरको भुईंतला ढलानका लागि अहिले जोडतोडले काम भइरहेको छ ।

‘सम्झौता भएको वर्ष दिन पूरा भयो । फाइनाइन्सियल प्रगति २६/२७ प्रतिशत हाराहारीमा छ । भौतिक प्रगति ३२ प्रतिशत पार भएको छ,’ निर्माण कम्पनीको तर्फबाट कार्यरत प्रोजेक्ट इन्जिनियर धर्मेन्द्र गुप्ताले बताए । १६ हजार दर्शक क्षमताको प्यारापिटसहित रंगशाला निमाण भइरहेको छ । टावर र प्यारापिट निर्माणको काम अगाडि बढे पनि मैदानको काम सुरु भएको छैन ।

उत्तरतर्फ रहेको टावरको ढलान केही दिनमै हुने गुप्ताले बताए । त्यसपछि लगत्तै दक्षिणतर्फको टावर ढलान पनि हुनेछ । उत्तरतर्फको टावरमा भीभीआईपी र मिडिया बक्स रहनेछ । दक्षिणतर्फको टावरमा खेलाडी, प्रशिक्षक र टिम व्यवस्थापनसँग सम्बन्धित व्यक्ति रहनेछन् । यी दुवै टावर तीन तलाका हुनेछन् । अहिले भुईंतलाको ढलान सुरसार हुँदै छ ।

टावरको पूर्व र पश्चिमतर्फ दुई खण्ड गरेर प्यारापिट रहने छन् । ‘टावरदेखि पश्चिमतर्फ पर्ने स्ट्यान्ड अर्थात प्यारापिट ‘ए’ को एक नम्बर खन्डको प्यारापिट ढलान भइसकेको छ । स्ट्यान्ड ‘ए’ कै दुई नम्बर खण्डको आधा ढलान भइसक्यो र आधाको ढलानका लागि डन्डी राख्ने काम भइरहेको छ,’ गुप्ताले जानकारी गराए । त्यसपछि टावरदेखि पूर्व पर्ने स्ट्यान्ड ‘बी’ को ३ नम्बर खण्डमा ढलानका लागि फर्मा राख्न सुरु गरिएको उनले बताए ।

स्ट्यान्ड अर्थात प्यारापिट ‘बी’को ४ नम्बर खण्डमा पीसीसी र सोलिङ पीसीसीको काम मात्रै भएको तर प्यारापिट ढलानको काम बाँकी रहेको छ । ‘यो वर्ष मैदान र पिचको काम सुरु हुँदैन । त्यो काम हामी अर्को वर्ष नै सुरु गर्ने छौं । पिच र मैदानको काम अन्तिममा गर्दा नै राम्रो हुने देखियो,’ उनले भने । काम पुरा गर्नुपर्ने ३० महिनाको अवधि रहेकामा १२ महिना पूरा भएर काम गर्न अब १८ महिना बाँकी छ ।

‘बीचमा फलामे डन्डी र सिमेन्टको अलि अभाव भयो । त्यसैले कामको प्रगतिमा अहिले एक महिना जति ढिला छौं । नभए अरू हिसाबले काम सन्तोषजनक नै छ । चारैतिर काम भइरहेको छ,’ इन्जिनियर गुप्ताले भने ।

भरतपुर महानगरपालिकाको नेतृत्वमा प्रदेश र संघीय सरकारको सहयोगमा रंगशाला निर्माणको काम भइरहेको हो । यसको निर्माण लागत ७८ करोड ५० लाख ९१ हजार रुपैयाँमा रहेको छ ।

२०७५ सालको माघ १६ गते चितवन रामपुरमा क्रिकेट रंगशाला बनाउने विषयमा काठमाडौंमा सम्झौतापत्रमा हस्ताक्षर भएको थियो । रामपुरमा त्रिभुवन विश्वविद्यालयको नाममा रहेको तर कृषि तथा वन विज्ञान विश्वविद्यालयले उपयोग गर्दै आएको २० विघा जमिनमा रंगशाला बन्न लागेको हो ।

जग्गा उपलब्ध गराएपछि धुर्मुस–सुन्तली फाउन्डेसनले देश विदेशका नेपालीसँग सहयोग जुटाएर करिब ३ अर्बको लागतमा दुई वर्षभित्रै रंगशाला बनाउने उद्घोष गरेको थियो । तर सहयोग जुट्न सकस भएपछि फाउन्डेसनले २०७८ भदौदेखि काम बन्द गरेको थियो । सोही वर्षको पुस २ मा रंगशालाको स्वामित्व लिन फाउन्डेसनले महानगरलाई पत्र लेखेको थियो ।

काम सुरु गरेको वर्ष दिन नहुँदै विश्व नै प्रभावित हुने गरेर कोरोना संक्रमण सुरु भयो । सोचेअनुरुप सहयोग नजुटेको, ५७ करोड १२ लाख रुपैयाँ बराबरको काम हुँदा उधारो १८ करोड ४३ लाख रुपैयाँ रहेको भन्दै फाउन्डेसन रंगशाला निर्माणबाट अलग भएको थियो । जुन ऋण अझै चुक्ता भएको छैन ।



२०८० कात्तिक २१ मा महानगरपालिकाले बागमती प्रदेश सरकारसँग मिलेर रंगशाला निर्माणको काम पूरा गर्ने सहमति गरेको हो । सहमति भएलगत्तै कात्तिक २३ मा संघीय सरकारले गौतम बुद्ध क्रिकेट रंगशालालाई राष्ट्रिय गौरवको आयोजनाका रूपमा अगाडि बढाउने निर्णय गरेको थियो । गत वर्षको असारमा निर्माण कम्पनीसँग सम्झौता भएर काम अगाडि बढेको हो । त्यसअघि फाउन्डेसनले रंगशालाको पिलर, प्यारापिट र मैदान निर्माणको काम सुरु गरिसकेको थियो ।