: अमेरिकी राष्ट्रपति डोनाल्ड ट्रम्पले ब्रिक्स देशमाथि १० प्रतिशत भन्सार लगाउने आफ्नो चेतावनी दोहोर्याएका छन्।
डोनाल्ड ट्रम्पले भने,‘जब मैले ६ ब्रिक्स देशबारे सुनेँ, उनीहरूले ठुलो क्षति बेहोरेका छन्। यदि उनीहरू अगाडि बढे भने चाँडै नै समाप्त हुनेछन्।’
ट्रम्पले यो भन्दै गर्दा कुनै पनि देशको नाम लिएनन्। ट्रम्पले भने, ‘हामी कुनै पनि देशलाई हामीसँग खेल खेल्न दिने छैनौँ।’
ट्रम्प र ब्रिक्स देशबीचको विवाद यसै महिना सुरु भएको थियो।
ब्रिक्स देशहरूको १७ औँ शिखर सम्मेलन यस महिनाको सुरुमा रियो दि जेनेरियोमा आयोजना भएको थियो।
ब्रिक्स रियो घोषणापत्रमा विश्वव्यापी शासन सुधार र अन्तर्राष्ट्रिय स्थिरताबारे कुरा गरिएको थियो। यस्तै एकपक्षीय भन्सार र गैर–भन्सार जस्ता मुद्दामा पनि छलफल गरिएको थियो।
यस वर्षको सुरुमा दोस्रो पटक अमेरिकी राष्ट्रपति बनेपछि डोनाल्ड ट्रम्पले कर युद्ध सुरु गरेका थिए।
ब्रिक्स रियो घोषणापत्र पछि राष्ट्रपति ट्रम्पले भने, ‘ब्रिक्सको अमेरिका विरोधी नीतिहरूसँग मिल्ने कुनै पनि देशलाई थप १० प्रतिशत भन्सार शुल्क लाग्नेछ। यस नीतिमा कुनै छुट हुनेछैन। यस विषयमा तपाईंको ध्यानाकर्षणका लागि धन्यवाद।’
