— पूर्वराष्ट्रपति विद्यादेवी भण्डारी, माओवादी अध्यक्ष पुष्पकमल दाहालसँगको भेटघाटपछि कांग्रेस नेता शेखर कोइरालाले आइतबार पार्टीभित्र आफू निकटका मन्त्री र सांसदहरुसँग चरणबद्ध छलफल गरेका छन् । कांग्रेस नेतृत्वमा वैकल्पिक गठबन्धन बनाउन प्रयासरत कोइरालाको पछिल्लो गतिविधिलाई अर्थपूर्ण रुपमा हेरिएको छ ।
कोइरालाले बिहान अनुपम फुडल्याण्ड पार्टी प्यालेस र दिउँसो याक एण्ड यतिमा सांसदहरुसँग छलफल गरेका थिए । कोइराला निकट सांसद हृदयराम थानीका अनुसार मुलुकमा बिग्रँदो परिस्थितिका बारेमा सांसदहरुसँग सुझाव लिने काम भएको बताए ।
‘शासकीय बेथिति र भ्रष्टाचारबाट आम नागरिकमा जनआक्रोश बढिरहेको परिप्रेक्षमा पार्टी र सरकारलाई सच्चिनकै लागि दबाब दिने छलफल गरिएको हो,’ थानीले भने ।
कोइरालाले राखेको छलफलले पार्टीभित्र संसदीय दलको नेतानै फेर्ने सम्मको लक्ष्य हो कि भन्ने प्रश्नमा थानीले अहिले त्यस्तो जोखिम लिने काम नहुने बताए । ‘शेखर कोइराला अहिले त्यस्तो बाटोमा जानु हुन्न । उहाँको राजनीतिक सक्रियता मुलुकमा बिग्रँदो परिस्थितिप्रति संवदेनशील बन्न पार्टीभित्र र सरकारलाई दबाब दिनका लागि हो ।’
कोइरालाले गत बिहीबार माओवादी अध्यक्ष पुष्पकमल दाहाललाई भेटेका थिए भने त्यसको भोलिपल्टै पूर्वराष्ट्रपति विद्यादेवी भण्डारीलाई भेटेका थिए । उनले केही दिनभित्र संसद्मा रहेका अन्य विपक्षी दलका नेताहरुसँग पनि भेटघाट गर्ने योजना बनाएका छन् ।
