— दक्षिण कोरियामा पाँच दिनसम्म परेको भारी वर्षाले आइतबारसम्म कम्तीमा १४ जनाको मृत्यु भएको छ भने अझै १२ जना हराइरहेको सरकारले जनाएको छ ।
गृह तथा सुरक्षा मन्त्रालयका अनुसार आइतबार भारी वर्षाका कारण घर भत्किँदा एक जना तथा सियोलको उत्तरपूर्वमा पर्ने गाप्योङ सहरमा खोलाले बगाएर अर्का एक जनाको मृत्यु भएको थियो ।
मन्त्रालयका अनुसार शनिबार परेको भीषण वर्षापछि आएको बाढीपहिरोले दक्षिणी सहर सान्चेओङमा आठ जनाको ज्यान गएको बताइएको छ । ६ जना बेपत्ता भएको पनि उल्लेख छ । मन्त्रालयको प्रतिवेदनअनुसार गाप्योङ र दक्षिणी सहर ग्वाङ्जुमा थप ६ जना बेपत्ता छन् ।
गत साताको सुरुमा सियोलको दक्षिणमा ओसानमा भारी वर्षाका क्रममा ओभरपासको रिटेनिङ पर्खाल ढलेपछि डुबानमा परेको कारमा चालकसहित तीन जना मृत फेला परेका थिए ।
स्थानीय समयानुसार आइतबार बिहान ९ बजेसम्म करिब ३ हजार ८ सय ४० जना स्थानीय विस्थापित भएको मन्त्रालयको प्रतिवेदनमा उल्लेख छ । आइतबार दक्षिण कोरियाको धेरैजसो भागमा वर्षा रोकिएको छ भने अब भारी वर्षा नहुने मन्त्रालयका अधिकारीहरूले जनाएका छन् । मन्त्रालयको प्रतिवेदनअनुसार बुधबारदेखि दक्षिणी क्षेत्रहरूमा करिब ६ सयदेखि ८ सय मिलिमिटर (२४ देखि ३१ इन्च) सम्म वर्षा भएको छ ।
