: नेपाल प्रिमियर लिग (एनपीएल) को फ्रेन्चाइज टोली चितवन राइनोजले आफ्नो लोगो परिवर्तन गरेको छ। चितवनले एनपीएलको दोस्रो संस्करणका लागि आफ्नो लोगो परिवर्तन गरेको हो।
चितवनले बुधबार एक प्रेस विज्ञप्ति जारी गर्दै चितवन सहरको पहिचानभन्दा ‘राइनोज’ अर्थात् गैंडाको प्रतीकलाई मुख्य प्राथमिकतामा राखेर नयाँ लोगो सार्वजनिक गरेको जनाएको छ। ‘गत सिजनको लोगोमा सहरको पहिचानलाई केन्द्रमा राख्दै ‘चितवन’ शब्दलाई अगाडि राखिएको थियो। यसपटक सार्वजनिक गरिएको लोगोमा ‘राइनोज’ अर्थात् गैंडालाई मुख्य प्रतीकका रूपमा प्रस्तुत गरिएको छ’, विज्ञप्तिमा भनिएको छ’, एक यस्तो प्रतीक जसले हाम्रो टिमको मर्म र फ्यानहरूको भावना दुवैलाई जोड्छ।’
चितवनले यो परिवर्तनलाई केवल डिजाइनमा मात्र नभई समर्पण र गर्वको झल्कोका रूपमा पनि व्याख्या गरेको छ। ‘अहिलेको लोगोमा गैंडा, चितवन, नेपाली क्रिकेट र एनपीएललाई माया गर्ने लाखौं समर्थकहरूको प्रतिनिधि बनेर अगाडि आएको छ’, विज्ञप्तिमा भनिएको छ, ‘भाव उही हो। पहिचान अझ मजबुद बनेको छ। गैंडा चितवनको मात्रै होइन, सिंगो देशको गर्व हो। यही प्रतीकलाई लिएर हामी सिजन २ मा अझ बलियो तरिकाले उत्रन तयार भएका छौं।’
गत सिजनमा मस्कट ‘मिस्टर गैंडा’ ले कमाएको अभूतपूर्व लोकप्रियताले फ्यानहरूको चाहनालाई स्पष्ट पारेको जनाएको छ। ‘यही माया र समर्थनलाई कदर गर्दै नयाँ लोगोमार्फत फ्यानहरूको भावनासँग अझ नजिकिने प्रयास गरिरहेका छौं’, विज्ञप्तिमा उल्लेख छ।
चितवन राइनोजका अध्यक्ष आयुष न्यौपानेले नयाँ लोगोले फ्यानहरूको रोजाइ र टिमको मर्मलाई स्पष्ट रूपमा देखाउने प्रयास भएको बताए। ‘नयाँ लोगो फ्यानहरूको रोजाइ र राइनोजको मर्मलाई अझ स्पष्ट ढंगले देखाउने प्रयत्न हो।
मिस्टर गैंडाको लोकप्रियता हाम्रो लागि संकेत थियो’, अध्यक्ष न्यौपानेले भने, ‘अब फ्यानहरू र गैंडाको पहिचान सँगसँगै लोगोको अगाडि रहनेछन्। भावना उही हो, तर यसको प्रस्तुति अझ स्पष्ट भएको छ।’
चितवनले दोस्रो संस्करणका लागि ६ खेलाडीलाई रिटेन गरेको छ। चितवनले मार्की खेलाडी कुशल मल्ल, रिजन ढकाल, कमलसिंह ऐरी, दीपक बोहरा, अमरसिंह रौटेला र गौतम केसीलाई रिटेन गरेको छ। रिजन र कमलसिंह ग्रेड ‘ए’, दीपक र अमर ग्रेड ‘बी’ तथा गौतम ग्रेड ‘सी’का खेलाडी हुन्।
यसैगरी पहिलो संस्करण खेलेका ६ खेलाडीलाई भने रिलिज गरेको छ। चितवनले शरद भेषवाकर, दीपेश श्रेष्ठ, विपिन रावल, सन्तोष कार्की, रञ्जित कुमार र सलाउद्दिन खानलाई रिलिज गरेको हो।
