: रूस र युक्रेनका प्रतिनिधिमण्डलको बैठक बुधबार टर्कीको इस्तानबुल शहरमा भएको छ। बैठकमा दुई देशबीच युद्धबन्दीको आदानप्रदानमा सम्झौता भएको हो।
युक्रेनी प्रतिनिधिमण्डलले युद्धविरामका लागि तत्परता व्यक्त गरेका थिए। रूसको सर्तले यसमा सम्झौता हुन नसकेपछि वार्ता एक घण्टाभन्दा कम समयमा सकिएको हो।
हालैका महिनामा दुई देशका प्रतिनिधिले तेस्रो पटक भेटेका हुन्। तर बुधबारको भेटघाट सात हप्तापछि भएको हो। अमेरिकी राष्ट्रपति डोनाल्ड ट्रम्पले सेप्टेम्बरमा रुसमाथि थप कडा प्रतिबन्ध लगाउने धम्की दिएपछि यो भेटघाट भएको हो।
रुस र युक्रेन केही दिनमै अर्को चरणको वार्ता गर्ने तयारीमा छन्। युक्रेनी राष्ट्रपति भोलोडिमिर जेलेन्स्कीले रुसी राष्ट्रपति भ्लादिमिर पुटिनसँग प्रत्यक्ष वार्ता गर्न इच्छा व्यक्त गरेका छन्।
रुस र युक्रेनबीच इस्तानबुलमा भएको पछिल्ला दुई चरणको वार्तामा युद्धबन्दीको आदानप्रदानमा सहमति भएको थियो। त्यसमा काम पनि सुरु भएको थियो। दुवै चरणको वार्तामा युक्रेनले युद्धविरामका लागि रुसले राखेका सर्त स्वीकार गरेन।
युक्रेनबाट रुसले के चाहन्छ ?
युक्रेनले अमेरिकाको नेतृत्वमा रहेको सैन्य संगठन नेटोमा सामेल हुने आफ्नो इच्छा त्यागोस् भन्ने रुस चाहन्छ। यस्तै क्रिमियासहित कब्जा गरिएका युक्रेनी भागमा रुसको अधिकारलाई मान्यता देओस् भन्ने पनि रुस चाहन्छ।
