: दक्षिण–पूर्वी इरानमा आतंकवादी आक्रमण भएको छ। यसमा करिब आठ जनाको मृत्यु भएको एएफपीले जनाएको छ।
इरानी राज्य सञ्चार माध्यमका अनुसार शुक्रबार इरानको दक्षिणपूर्वी सिस्तान–बलुचिस्तान प्रान्तको एक अदालतमा भएको घातक आतंकवादी आक्रमणमा कम्तिमा ८ जनाको मृत्यु भएको छ। यस्तै एक दर्जनभन्दा बढी घाइते भएका छन्। फार्स समाचार एजेन्सीले सिस्तान–बलुचिस्तानको राजधानी जाहेदानमा भएको आक्रमणमा आत्मघाती बम हमलाकारी संलग्न भएको हुन सक्ने जनाएको छ।
इरानको अशान्त दक्षिणपूर्वी सिस्तान–बलुचिस्तान प्रान्तको सुन्नी जैश अल–अदल बलुच समूहका बन्दुकधारीले एक अदालत भवनमा आक्रमण गरेको इरानी मिडियाले जनाएको छ।
अदालत परिसर वरिपरि विस्फोट र गोलीबारी सुनिएको थियो। यसका साथै जैश अल–अदलले एक विज्ञप्ति जारी गर्दै आक्रमणको जिम्मेवारी लिएको छ।
बलुच मानव अधिकार समूहले प्रत्यक्षदर्शीलाई उद्धृत गर्दै आक्रमणमा केही न्यायिक कर्मचारी र सुरक्षाकर्मी मारिएको वा घाइते भएको बताएको छ।
