: संयुक्त राष्ट्रसंघको विश्व खाद्य कार्यक्रमले गाजामा करिब तीन जनामध्ये एक जना केही दिनदेखि खानाविहीन रहेको चेतावनी दिएको छ।
विश्व खाद्य कार्यक्रम (डब्ल्यूएफपी)ले एक विज्ञप्ति जारी गर्दै भनेको छ,‘कुपोषण बढ्दै गएको छ र ९० हजार महिला तथा बालबालिकालाई तत्काल उपचारको आवश्यकता छ।’
गाजामा यस हप्ता अनिकाल अझ खराब हुँदै गएको एजेन्सीहरूले जनाएका छन्। गाजाको हमासद्वारा सञ्चालित स्वास्थ्य मन्त्रालयका अनुसार शुक्रबार कुपोषणका कारण थप नौ जनाको मृत्यु भएको छ।
मन्त्रालयका अनुसार इजरायलसँगको युद्ध सुरु भएदेखि कुपोषणका कारण मृत्यु हुनेको कुल संख्या १२२ पुगेको छ। गाजा भित्र र बाहिर सबै आवागमन नियन्त्रण गर्ने इजरायलले यस क्षेत्रमा पुग्न कुनै पनि सहायतालाई नरोकिएको बताएको छ।
इजरायलले गाजामा कुपोषणका लागि हमासलाई पनि दोष दिएको छ। हमासद्वारा सञ्चालित स्वास्थ्य मन्त्रालयका अनुसार अक्टोबर ७, २०२३ देखि गाजामा ५९,००० भन्दा बढी मानिस मारिएका छन्।
