— गाजामा युद्धका कारण उत्पन्न मानवीय संकट झनै गम्भीर बन्दै गएको सन्दर्भमा, इजरायलले केही सुरक्षित स्थलमार्गहरूबाट मानवीय सहायता सामग्री पठाउन अनुमति दिएको निर्णयलाई संयुक्त राष्ट्रसंघले स्वागत गरेको छ ।
संयुक्त राष्ट्रसंघका आपतकालीन सहायता समन्वयक टम फ्लेचरले यस निर्णयप्रति सकारात्मक प्रतिक्रिया दिँदै, यो अवसरमा सयौं हजार भोकमरी पीडित नागरिकहरूसम्म सहायता पुर्याउने प्रयास गरिने बताए । उनले सामाजिक सञ्जालमार्फत भने, 'गाजामा मानवीय सहायता पठाउने अनुमति दिइएको सूचना स्वागतयोग्य छ । हाम्रो टोली यथासम्भव धेरै मानिससम्म पुग्ने प्रयासमा जुटिरहेको छ ।'
संयुक्त राष्ट्रसंघको मानवीय मामिलासम्बन्धी समन्वय कार्यालय (ओचा) ले केही दिनअघि गाजाको अवस्था पहिले नै अत्यन्तै भयानक रहेको र तीव्रगतिमा झनै खराब बन्दै गएको चेतावनी दिएको थियो । ओचाका अनुसार भोकमरी, कुपोषण र सरसफाइको अभावका कारण त्यहाँका नागरिकहरूमा रोगको जोखिम उच्च बनेको छ, जसले छिट्टै ज्यानै जाने अवस्था निम्त्याउन सक्छ । हाल गाजामा सीमित मात्रामा पुगिरहेको राहत सामग्री आवश्यकताको तुलनामा अत्यन्त न्यून रहेको ओचाले जनाएको छ ।
ओचाले यदि इजरायलले सहायता सामग्री प्रवेशका लागि सीमा खुला गरिदियो भने इन्धन, उपकरण र कर्मचारीको सुरक्षित सञ्चालनको अनुमति प्रदान गर्यो भने, संयुक्त राष्ट्रसंघ तुरुन्तै खाना, स्वास्थ्य सेवा, पिउने पानी, फोहोर व्यवस्थापन, पोषण सामग्री तथा अस्थायी आश्रयका सामग्रीहरूको आपूर्ति तीव्र गतिमा पुर्याउने प्रष्ट पारेको छ । तथापि, पछिल्ला दिनहरूमा इजरायली सुरक्षाबलबाट लगाइएका विभिन्न रोकावटका कारण सहायता अभियानहरू प्रभावित भएका छन् । बिहीबार गरिएका १५ मध्ये केवल पाँच वटा मात्र सहायता अभियान सफलतापूर्वक सम्पन्न भएका थिए ।
ओचाले हालै यस्तो आपतकालीन अवस्थालाई ध्यानमा राख्दै युद्धविरामको अवस्थामा तुरुन्त कार्यान्वयन गर्न मिल्ने विस्तृत सहायता आपूर्ति योजना समेत सार्वजनिक गरिसकेको छ । गाजामा लाखौं निर्दोष नागरिक गम्भीर संकटमा रहेका सन्दर्भमा संयुक्त राष्ट्रसंघले सबै पक्षलाई अन्तर्राष्ट्रिय मानवीय कानुनको सम्मान गर्न र सहायता पुर्याउने मार्ग खुला राख्न आग्रह गरेको छ ।
