— चीन सरकारले आर्टिफिसियल इन्टेलिजेन्स (एआई) सम्बन्धी विश्वव्यापी सहकार्य संगठन स्थापना गर्ने प्रस्ताव अघि सारेको छ । यस संगठनको मुख्यालय साङ्घाइमा राख्ने योजना रहेको चीनको समाचार संस्था सिन्ह्वाले जनाएको छ ।
यसमार्फत विशेषगरी ग्लोबल साउथ भनिने विकासोन्मुख देशहरूलाई एआईमा चीनले गरेका प्रगतिसँगै एआईसम्बन्धी उत्पादन साझा गर्ने उद्देश्य राखिएको छ ।
द्रुत गतिमा विस्तार भइरहेको एआई प्रविधिको नियमनमा सघाउनुका साथै चीनले हासिल गरेका प्रगतिहरूमा सहकार्य गर्न यस्तो विश्वव्यापी संगठन खोल्ने योजना रहेको चिनियाँ प्रधानमन्त्री ली जिआङले बताएका छन् । उनले साङ्घाइमा जारी ‘वर्ल्ड आर्टिफिसियल इन्टेलिजेन्स कन्फरेन्स २०२५’ मा यस्तो प्रस्ताव अघि सारेका हुन् ।
संगठनको उद्देश्य डिजिटल डिभाइड घटाउँदै समावेशी विकासका लागि ‘एआई फर गुड’ अवधारणालाई अघि बढाउनु हो । यसले विकासोन्मुख देशहरूले गरेको आह्वानलाई सम्बोधन गर्ने चीनले ठानेको छ ।
प्रधानमन्त्री जिआङले विश्व एआई सम्मेलन र विश्वव्यापी एआई सुशासन उच्चस्तरीय बैठकको उद्घाटन समारोहमा बोल्दै एआईको साझा शासनमा अन्तर्राष्ट्रिय समुदायले विशेष ध्यान दिनुपर्ने बताएका थिए ।
उनले एआई विकास र प्रयोगका लागि व्यापक सहमतिमा आधारित साझा नियम र संरचना बनाउन आवश्यक रहेको औँल्याए । चीनले एआईसम्बन्धी बहुपक्षीय र द्विपक्षीय सहकार्यलाई निरन्तर प्रवर्द्धन गरिरहेको उनको दाबी थियो ।
समाचार संस्था सिन्ह्वाका अनुसार, संगठनले अन्तर्राष्ट्रिय सहकार्यलाई मजबुत बनाउनेछ । एआई र उन्नत प्रविधि क्षेत्रका माग र आपूर्ति श्रृंखलालाई जोड्ने प्लेटफर्मका रूपमा यस संगठनले काम गर्ने भनिएको छ । चीनले नीति निर्माण, प्रविधि विस्तार तथा सुशासनका मापदण्ड निर्माणमा विभिन्न देशसँग समन्वय बढाउने दाबी गरिएको छ ।
गत साता अमेरिकाले पनि एआई ब्लुप्रिन्ट सार्वजनिक गर्दै अमेरिकी एआई निर्यात बढाएर यस महत्वपूर्ण प्रविधिमा अमेरिकाको प्रभुत्व कायम राख्ने उद्देश्य उजागर गरेको थियो । रोयटर्सका अनुसार चिनियाँ प्रधानमन्त्री जिआङले अमेरिका भनेर स्पष्ट उल्लेख नगरे पनि चीनको एआई विस्तारमा वासिङ्टनले बाधा पुर्याउने प्रयास गरेको आशय प्रकट गरेका थिए । ‘एआई केही देश र कम्पनीहरूको एकाधिकार बन्ने खतरा छ,’ उनले भने ।
