— अमेरिकी राष्ट्रपति डोनाल्ड ट्रम्पको अगस्ट १ देखि लागू गर्ने गरी विश्वभरका लागि कर नीति ल्याइरहँदा संयुक्त राज्य अमेरिका र चीनका उच्च आर्थिक अधिकारीहरूबीच यसबारेमा सोमबार वार्ता भएको छ ।
विश्वका शीर्ष दुई अर्थतन्त्र भएका मुलुकबीच स्विडेनको राजधानी स्टकहोममा हुने वार्ता दुई दिनसम्म चल्ने बताइएको छ । सोमबार मात्रै ईयूसँग नयाँ सम्झौता गरेको अमेरिकासँग अन्य देशहरू पनि कर सम्झौतालाई अन्तिम रूप दिन हतारिएका छन् । अमेरिकाले यसअघि नै अगस्ट १ अघि सम्झौताका लागि वार्तामा नआएको खण्डमा नयाँ र चर्को भन्सार दर लागू गर्ने बताएकाले पनि दर्जनौं व्यापारिक साझेदारहरूका लागि आगामी दिनहरूमा सफल सम्झौताले निकै अर्थ राख्ने देखिएको हो ।
ब्राजिल र भारतजस्ता साझेदारलाई समेत अमेरिकामा आयात हुने कर दरमा १० प्रतिशतको ‘आधारभूत’ दरबाट ५० प्रतिशतसम्म कर बढ्ने सम्भावना छ । येल विश्वविद्यालयको बजेट ल्याब रिसर्च सेन्टरको तथ्यांकअनुसार ट्रम्प प्रशासनले लगाएको करले अमेरिकी आयातमा सन् १९३० को दशकयता कहिल्यै नदेखिएको स्तरमा कर वृद्धि गरिसकेको छ । अमेरिकी अर्थमन्त्री स्कट बेसेन्टसहितको प्रतिनिधिमण्डलले स्विडेनमा उपप्रधानमन्त्री हे लिफेङको नेतृत्वमा रहेको चिनियाँ टोलीसँग भेट्दा सबैका आँखा वासिङ्टन र बेइजिङबीचको वार्तामा केन्द्रित हुने देखिएको छ ।
अप्रिलमा दुवै देशले एकअर्काका उत्पादनमा एकपछि अर्को गर्दै तीन अंकसम्मको कर वृद्धि गरेपछि भन्सार युद्ध चर्कने अनुमान गरिएको थियो । तर पछि अमेरिकाले अस्थायी रूपमा ३० प्रतिशतसम्ममा कर झारेपछि चीनले पनि प्रतीकारात्मक रूपमा १० प्रतिशतमा झारेको थियो । तर गत मे महिनामा जेनेभामा भएको वार्तापछि सुरु भएको ९० दिने युद्धविरामको समयावधि अगस्ट १२ मा सकिँदै छ । जेनेभा बैठकपछि दुवै पक्षले असहमति सुल्झाउन लन्डनमा बैठक गरेका थिए ।
‘मिनर्भा टेक्नोलोजी फ्युचर्स’का रणनीति प्रमुख एमिली बेन्सनले भने, ‘विशेषगरी लन्डनवार्तापछि चीनबारे अमेरिकी प्रशासनको सोचमा निकै महत्त्वपूर्ण परिवर्तन आएको देखिन्छ ।’ उनले सम्भव भएसम्म सम्बन्धलाई न्यानो बनाउने र तनाव बढाउन सक्ने कुनै पनि कारकलाई नियन्त्रण गर्ने कुरामा बढी केन्द्रित रहेको बताए । चीनसँगको वार्ताबाट कुनै ठोस सहमति नभए पनि केही दुर्लभ खनिज र सेमीकन्डक्टर प्रवाह पुनः सुरु गर्न दुवै देश सहमत भएको अर्थमन्त्री बेन्सन्टले बताएका छन् ।
बेन्सनले ९० दिनको करवृद्धि स्थगनमा विस्तार गर्नेतर्फ ठोस परिणाम आउने संकेत पनि गरेका छन् । साउथ चाइना मर्निङ पोस्टले दुवै पक्षका स्रोतलाई उद्धृत गर्दै वासिङ्टन र बेइजिङले थप ९० दिनका लागि कर वृद्धि रोक्ने सहमति गर्ने अपेक्षा गरिएको जनाएको छ । ट्रम्पले ईयू, बेलायत, भियतनाम, जापान, इन्डोनेसिया र फिलिपिन्ससँग भने सम्झौता भइसकेको घोषणा गरेका छन् । ‘सेन्टर फर स्ट्राटेजिक एन्ड इन्टरनेसनल स्टडिज’का सदस्य थिबल्ट डेनामिएलले भने, ‘अमेरिका र चीनबीच कर सम्झौताका बारेमा पुनः वार्ता हुनुले दुवै पक्ष समस्या समाधानका लागि गम्भीर रहेको देखाउँछ ।’
अमेरिका–चीन व्यापार परिषद्का अध्यक्ष सिन स्टेनले भने स्टक बजारले स्टकहोम वार्ताबाट ठूलो प्रतिफलको अपेक्षा नगरेको बताएका छन् । भने, ‘व्यापारिक समुदाय अहिलेको आर्थिक अधिकारीबीचको वार्ताबाट भन्दा पनि यस वर्षको अन्त्यमा बेइजिङमा दुई राष्ट्रपतिबीच हुने भेटवार्ता निकास निस्कनेमा बढी आशावादी छ ।’ उनले अन्तिम निर्णय राष्ट्रपतिस्तरीय वार्ताले मात्रै दिन सक्नेमा दुई मत नरहेको बताउँछन् ।
