— उत्तरपूर्वी कंगोमा ‘एलाइड डेमोर्क्याटिक फोर्स’ (एडीएफ) का विद्रोहीले आइतबार गरेको हमलामा परी कम्तीमा ४३ जनाको मृत्यु भएको कंगो सेनाले जनाएको छ ।
कंगोमा तैनाथ संयुक्त राष्ट्रसंघीय शान्ति अभियानका अनुसार ९ जना बालबालिकाको ज्यान गएको छ । इस्लामिक स्टेटप्रति समर्पित एडीएफले कोमान्डा सहरको क्याथोलिक चर्चमा प्रार्थनाका लागि भेला भएकामाथि हमला गरेको स्थानीयले जनाएका छन् ।
प्रार्थना स्थललक्षित उक्त हमला मानव अधिकार र अन्तर्राष्ट्रिय मानवीय कानुनको मापदण्डविपरीत भएको शान्ति अभियानका उपप्रमुख भिभियन भ्यान डे पेरेले बताए । कंगोको सेनाले भने हमलालाई ‘नरसंहार’ को संज्ञा दिँदै त्यसको निन्दा गरेको छ । ‘करिब ४३ जना मारिनुका साथै अन्य धेरै जना गम्भीर रूपमा घाइते भएका छन्,’ कंगो सेनाले जनाएको छ । एडीएफले भने ‘आतंक फैलाउने समूहमाथि’ बदला लिएको बताएको छ ।
युगान्डाको सिमानामा रहेको इटुरी क्षेत्रमा महिनौँको शान्तिपूर्ण वातावरणपछि पुनः रक्तपात भएको हो । यसअघि एडीएफले नै मम्बासा क्षेत्रमा गत फेब्रुअरीमा गरेको हमलामा पनि २३ जनाको मृत्यु भएको थियो । इरुमु क्षेत्रको कोमान्डा सहर सोपो, उत्तरी किवु र मनिमालाई जोड्ने तीन अन्य प्रान्तहरूको पनि व्यापारिक केन्द्र हो ।
युगान्डाको विद्रोही समूह एडीएफले उत्तरपूर्वी प्रजातान्त्रिक गणतन्त्र कंगोमा हजारौं सर्वसाधारणको हत्या र लुटपाट गर्दै आएको छ । २०२१ को अन्त्यमा, कम्पाला र किन्सासाले एडीएफविरुद्ध ‘सुजा’ भनिने संयुक्त सैन्य कारबाही गरेपछि सुरु भएको विद्रोह अहिलेसम्म नियन्त्रणमा आउन सकेको छैन । कंगोली सेनाले एडीएफसँग बदला लिने प्रतिबद्धता व्यक्त गर्दै जनतालाई सतर्क रहन र कुनै पनि शंकास्पद व्यक्तिहरू फेला परेमा रिपोर्ट गर्न आह्वान गरेको छ ।
