— इंग्लिस कप्तान बेन स्टोक्सले काँधको चोटका कारण भारतविरुद्धको निर्णायक पाँचौं तथा अन्तिम टेस्ट नखेल्ने भएका छन् ।
इंग्लिस एन्ड वेल्स क्रिकेट बोर्डका अनुसार उप–कप्तान रहेका ओली पोपले ओभलमा बिहीबार सुरु हुने टेस्टमा टिमको नेतृत्व गर्नेछन् । पाँच टेस्टको शृंखलामा इंग्ल्यान्ड २–१ ले अगाडि छ ।
शृंखलाको अघिल्ला टेस्टमा पनि स्टोक्स चोटसँग गुज्रिएका थिए । तर उनले सिरिजमा अहिलेसम्म १ सय ४० ओभर बलिङ गरेका छन् । उनले आफ्नो खेलजीवनमा एकै शृंखलामा यति धेरै बलिङ गरेको यो नै पहिलो पटक हो । उनले १७ विकेट लिएका छन् । यो दुवै टिमका बलरले लिएको सबैभन्दा बढी विकेट हो ।
स्टोक्सले बुधबार आयोजित प्रिम्याच कन्फ्रेन्समा भने, ‘अन्तिम खेल खेल्न नपाएकोमा म स्वाभाविक रूपमा दुःखी छु ।’ आफ्नो पूरा खेलजीवन चोटले सताइएका ३४ वर्षीय स्टोक्सले थपे, ‘मेरो काँधमा समस्या छ । यस्तो स्थितिमा जो कोही पनि भावुक हुने गर्छ ।’ म्यानचेस्टरको ओल्ड ट्राफोर्डमा भएको चौथो टेस्ट बराबरीमा टुंगिएको थियो ।
त्यस खेलमा सहभागी इंग्लिस टिममा चार खेलाडी परिवर्तन गरेर अन्तिम खेलका लागि नाम घोषणा गरिएको छ । टिममा फर्केकामा ज्याकोब बेथहेल, जोस टङ्ग र गस एटकिन्सन र जेमी ओभरटन छन् । तीव्र गतिका बलरद्वय जोफ्रा आर्चर र ब्रेडन कार्सेलाई आराम दिइएको छ ।
