— किर्ते गरी नक्कली कागजात बनाउने कार्यमा संलग्न दुई जनालाई प्रहरीले पक्राउ गरेको छ । पक्राउ पर्नेमा गोरखा सहिद लखन गाउँपालिका-१ का ४१ वर्षीय किरण अर्याल र काभ्रेपलान्चोकको धुलिखेल नगरपालिका-१२ बस्ने ३८ वर्षीय जितेन्द्र तामाङ छन् ।
अर्यालले काठमाडौँ महानगरपालिका-३१, शंखमुलमा गज्जबको फोटो कपी एन्ड स्टेसनरी सेन्टरमार्फत किर्ते गरी नक्कली कागजात बनाउने गरेको र ती कागजात तामाङले बिक्री वितरण गर्ने गरेको प्रहरीले पत्ता लगाएको छ । जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक मीनबहादुर घलेका अनुसार धुलिखेल नगरपालिका-१२को वडा कार्यालयमा तामाङले पेस गरेको कागजातमा शंकास्पद देखिएपछि कार्यालयले प्रहरीलाई खबर गरेको थियो । प्रहरीले अनुसन्धान गर्दा नक्कली कागजात भएको पुष्टि भएको उनले जनाए ।
उनीहरुले धुलिखेल-१२ को वडा कार्यालयको लेटर प्याड, छाप तथा वडाध्यक्षको सहीसमेत किर्ते गरी नक्कली बनाएको पाइएको छ । उनीहरूको साथबाट विभिन्न २६ वटा संस्थाको छाप, कागजात, विभिन्न दरको नेपाली नगद ६८ हजार ७७० रुपैयाँ, विभिन्न मुलुकका १४ वटा नोट, २ वटा नागरिकता, राहदानी, पेन ड्राइभ ११ वटा, २ वटा हार्ड ड्राइभलगायत सामग्रीसमेत बरामद गरिएको छ ।
सोमबार पक्राउ परेका उनीहरुलाई लिखतसम्बन्धी कसुर (सरकारी छाप दस्तखत किर्ते) मुद्दा दर्ता गरी जिल्ला अदालत काभ्रेपलाञ्चोकबाट पाँच दिनको म्याद थप अनुमति लिई अनुसन्धान गरिरहेको जिल्ला प्रहरी कार्यालय काभ्रेले जनाएको छ ।
