: नेकपा एमालेका महासचिव शंकर पोखरेलले सबै मिलेर मुलुकको आर्थिक परिवर्तनका लागि काम गर्नुपर्ने बताएका छन्।
राष्ट्रिय युवा संघ नेपालद्वारा आयोजित एक महिने वृहत् रक्तदान अभियानको शुभारम्भ तथा खीर खाने कार्यक्रमलाई बिहीबार भृकुटीमण्डपमा सम्बोधन गर्दै उनले राजनीतिक परिवर्तनका लागि काम सम्पन्न भइसकेको बताएका हुन्।
कृषिलाई रूपान्तरण गर्न नसकिए देशको विकास हुन नसक्ने भन्दै महासचिव पोखरेलले नयाँ पुस्तालाई कृषिमा जोड्नु पर्ने बताए। उनले पछिल्लो नयाँ पुस्ता कृषिमा नजोडिँदा देश समस्यामा परेको बताए।
महासचिव पोखरेलले समयमा नै वर्षा नहुँदा तराई क्षेत्रका किसानहरू मर्कामा परेकाले सरकारले किसानलाई सहयोग गर्ने नीति अवलम्बन गरेको जिकिर गरे। उनले अब नयाँ पुस्तालाई कृषिमा जोड्ने कुरा युवा आन्दोलनको साझा विषय बन्नुपर्नेमा जोड दिए।
