अमेरिकी राष्ट्रपति डोनाल्ड ट्रम्पले एक कार्यकारी आदेशमा हस्ताक्षर गरेका छन्। यस अन्तर्गत क्यानडामाथिको भन्सार कर अब २५ प्रतिशतबाट बढाएर ३५ प्रतिशत पुर्याइएको छ।
यस्तै राष्ट्रपति ट्रम्पले व्यापार सम्झौताका लागि तोकेको समयसीमाभन्दा केही घण्टा अघि ह्वाइट हाउसले दर्जनौं देशमाथि नयाँ भन्सार दर जारी गरेको छ। यी दर सात दिनमा लागू हुनेछन्।
यसअघि बिहीबार राष्ट्रपति ट्रम्पले मेक्सिकोमा कर लगाउने समयसीमा ९० दिन थपेका थिए।
यस्तै बुधबार ट्रम्पले अगस्ट १ देखि भारतबाट अमेरिका आउने सबै सामानमा २५ प्रतिशत कर लगाइने घोषणा गरेका थिए।
उनले रुसबाट हतियार र तेल खरिद गर्दा भारतमाथि थप आयात शुल्क लगाउनेबारे पनि कुरा गरेका छन्।
अप्रिल २ मा अमेरिकी राष्ट्रपति डोनाल्ड ट्रम्पले भारतसहित विश्वका १०० देशमा भन्सार लगाउने घोषणा गरेका थिए।
डोनाल्ड ट्रम्पले कुनै देशले अमेरिकी सामानमा उच्च आयात शुल्क लगाउँछ भने अमेरिकाले पनि त्यो देशबाट आउने सामानमा उच्च शुल्क लगाउने बताए। ट्रम्पले यसलाई 'पारस्परिक शुल्क' भनेका छन्।
