— आईसीसी महिला टी–२० विश्वकप छनोट क्रिकेट प्रतियोगिता नेपालमा हुने भएको छ । अन्तर्राष्ट्रिय क्रिकेट परिषद्ले १२ जनवरीदेखि २ फेब्रुअरीसम्म हुने प्रतियोगिताको आयोजकमा नेपाललाई चुनेको हो ।
नेपालमा हुने यो हालसम्मको ठूलो क्रिकेट प्रतियोगिता हो । सन् २०२३ मा पुरुषतर्फ एसियाली टी–२० छनोट प्रतियोगिता भएको थियो । यस पटक विश्व क्रिकेटको सर्वोच्च संस्था आईसीसीले नेपाललाई ग्लोबल छनोट आयोजना गर्न दिएको हो ।
प्रतियोगिता मूलपानीको माथिल्लो र तल्लो क्रिकेट मैदानमा हुनेछ । शीर्ष चार टोलीले इंग्ल्यान्ड र वेल्समा जुनमा हुने टी–२० विश्वकपमा स्थान बनाउनेछन् । २०२४ मा दुबईमा भएको प्रतियोगिताबाट बंगलादेश र स्कटल्यान्डले यस पटकको छनोट प्रतियोगितामा आफ्नो सहभागिता निश्चित गरिसकेका छन् ।
एसिया क्षेत्रबाट थाइल्यान्ड र नेपाल तथा अमेरिकी क्षेत्रबाट अमेरिकाले छनोटमा आफ्नो स्थान पक्का गरिसकेका छन् । अब अफ्रिका र युरोपको छनोटबाट २–२ राष्ट्र तथा इस्ट एसिया–प्यासिफिक क्षेत्रबाट १ टोलीसहित १० राष्ट्रले प्रतियोगिता खेल्नेछन् ।
सहभागी १० राष्ट्रलाई दुई समूहमा विभाजन गरिनेछ । त्यसपछि सुपर सिक्स हुँदै फाइनल हुनेछ । टी–२० विश्वकप छनोटको पूर्ण खेल तालिका पछि प्रकाशित गरिने आईसीसीले जनाएको छ ।
मेमा थाइल्यान्डमा भएको छनोट प्रतियोगिताबाट थाइल्यान्ड र नेपालले विश्वकप छनोटमा स्थान बनाएका थिए । पहिलो पटक विश्वकप छनोटमा स्थान बनाएको अवस्थामा घरेलु मैदानमै आयोजना हुने नेपाली क्रिकेटका लागि ठूलो महत्त्व भएकाले आफूहरू उत्साही भएको कप्तान इन्दु बर्माले सुनाइन् । यो प्रतियोगिताको आयोजना नेपाललाई चिनाउने अवसर पनि भएको उनको बुझाइ छ ।
‘नेपालमा पहिलो पटक महिला क्रिकेटको यति ठूलो प्रतियोगिता हुन लागेको छ । खेलाडी, समर्थकसहित सबै नेपालीलाई यो गर्व गर्ने क्षण हो, नयाँ पुस्ताले घरमै खेल हेर्ने अवसर पाउनेछन्,’ इन्दुले कान्तिपुरसँग भनिन्, ‘एउटा खेलाडीका रूपमा भन्नुपर्दा ठूलो टिमसँग खेल्न पाइरहेका छौं । घरेलु मैदानमा हामीले अन्तर्राष्ट्रिय क्रिकेट खासै खेल्न पाएका छैनौं, टी–२० विश्वकप छनोट आउन ४–५ महिना अझै बाँकी छ, राम्रो तयारी भयो भने घरेलु मैदानमा नतिजा राम्रो ल्याउन सकिन्छ । आफ्नै अगाडि खेल्न पाउँदा दर्शकले पनि खेलाडीलाई अझ नजिकबाट चिन्न पाउँछन् ।’
महिला क्रिकेटमा नेपालले अहिलेसम्म आईसीसी र एसियाली क्रिकेट परिषद् (एसीसी) को कुनै प्रतियोगिता आयोजना गरेको छैन । सन् २०१९ मा नेपालमा भएको १३ औं दक्षिण एसियाली खेलकुदमा महिला क्रिकेट विधा पोखरामा आयोजना भएको थियो । त्यसपछि नेपालले केही द्विपक्षीय र तीन देशीय शृंखला त्रिवि क्रिकेट मैदान कीर्तिपुरमा आयोजना गरेको थियो ।
यस अर्थमा नेपालले लगातार दुई वर्ष महिला अन्तर्राष्ट्रिय क्रिकेटको दुई ठूला प्रतियोगिता आयोजना गर्नेछ । २०२७ मा नेपालले बंगलादेशसँग मिलेर आईसीसी यू–१९ विश्वकप पनि आयोजना गर्दै छ । आईसीसीले महिला टी–२० छनोट आयोजना गर्न दिने निर्णय नेपाली क्रिकेटका लागि ऐतिहासिक भएको नेपाल क्रिकेट संघका प्रवक्ता छुम्बी लामा बताउँछन् ।
‘आईसीसीको निर्णयपछि हामीले बिहीबारै बोर्डमा यसबारे समीक्षा गर्यौं, ग्लोबल क्रिकेटमा नेपालले मञ्च पाउँदै गएको हो कि भन्ने भएको छ,’ लामाले भने, ‘नेपालले यस्तो प्रतियोगिता सफलतासाथ आयोजना गर्न सक्छ भन्ने देखिएको छ । मूलपानीमा पनि क्रिकेट मैदान बन्नाले नेपाललाई थप अन्तर्राष्ट्रिय क्रिकेट प्रतियोगिता आयोजना गर्न ढोका खुलेको छ ।’ उनले कीर्तिपुर मैदान पुनर्निर्माणका क्रममा रहेकाले सकियो भने त्यहाँ पनि खेल हुन सक्ने बताए ।
