: स्थायी बसोबास अनुमति प्राप्त नभइ अस्थायी संरक्षित स्थिति (टीपीएस)को आधारमा अमेरिका बसिरहेका नेपाली नागरिकले तत्काल अमेरिका छाड्न नपर्ने भएको छ । अधिकार प्राप्त सेक्रेटरी अफ होमल्याण्ड सेक्युरिटीले टीपीएस नविकरण नगर्ने घोषणा गरेसँगै टीपीएसमा रहेका धेरै नेपाली अमेरिका छाड्ने अवस्थामा पुगेका थिए ।
तर, अमेरिकाको क्यालिफोर्निया राज्यको सानफ्रान्सिस्कोस्थित एक संघीय अदालतमा टीपीएससको निरन्तरताको मागसहित मुद्दा दायर गरिएको थियो । जसमा मंगलबार भएको प्रारम्भिक सुनुवाइपछि बिहीबार अदालतले फैसला गर्दै नोभेम्बर १८,२०२५ सम्म पुनः सुनुवाइ गर्ने र तत्कालका लागि टीपीएस खारेजी प्रक्रिया स्थगन गर्न सेक्रेटरी अफ होमल्याण्ड सेक्युरिटीलाई निर्देशन दिएको छ ।
यो टीपीएस खारेज गर्ने निर्णय कार्यन्वयन तत्काललाई स्थगन गर्न आएको आदेशबाट नेपाल,निकरागुवा र होन्डुरसका करिव ६० हजार टिपिएसमा रहेकाहरूलाई राहत मिलेको छ । यदि अदालतले यो आदेश नगरेको भए आउँदो अगस्त ५ भित्रमा उनीहरूले अमेरिका छोड्नुपर्ने थियो । नेशनल टीपीएस अलायन्सलगायतले सरकारको निर्णयविरुद्व मुद्दा जाहेर गरेका थिए ।
