। प्रधानमन्त्री केपी शर्मा ओलीले बीपी कोइरालाको बौद्धिकताको प्रभावका कारण गणेशमान सिंह नेपाली कांग्रेसमा लागेको बताएका छन् । सिंहसँग अलि बढी सघन कुराकानी भएको भए कम्युनिष्ट पार्टीमै आउनसक्ने पनि उनले अनुमान लगाए ।
‘गणेशमानजीसँग अलि सघन कुराकानी भएको भए कम्युनिष्ट पार्टीमै आउनुहुन्थ्यो होला । तर उहाँमा बीपी कोइरालाको बौद्धिकताको प्रभाव अलि भयो । त्यतै जानुभयो,’ उनले भने ।
शनिबार नेकपा एमाले पार्टी केन्द्रीय कार्यालय च्यासलमा आयोजित तुल्सीलाल अमात्यको २८ औं स्मृति दिवसमा आयोजित कार्यक्रमलाई सम्बोधन गर्ने क्रममा उनले यस्तो बताएका हुन् ।
गणेशमान सिंह शहीद गंगालाल श्रेष्ठका मित्र भएकाले पनि गणेशमानलाई पुष्पलाल श्रेष्ठले सम्मान गर्ने गरेको उनले बताए ।
‘गणेशमान पुष्पलालका दाजु शहीद गंगालालका साथी हुन् । एकैदिन प्रजा परिषद्को सदस्यता लिएका हुन् । दाजुको साथी भएको हुनाले पुष्पलालले पनि गणेशमानलाई अत्यन्त सम्मान गर्नुहुन्थ्यो,’ उनले भने, ‘पुष्पलाल राजनीतिमा लाग्ने उमेर नहुँदै सर्वश्वसहित जन्मकैद पाइसक्नुभएको थियो, गणेशमान सिंहले । पुष्पलाल गंगालालबाट प्रभावित हो । उहाँले १३—१४ वर्षदेखि नै राजनीति थाहा पाउनु भयो । वामपन्थी राजनीति, देशभक्तिपूर्ण राजनीतिको समर्थन गर्नुभयो ।’
प्रधानमन्त्री ओलीले अग्रजका पूरा हुन बाँकी सपना पूरा गर्न लाग्नुपर्ने बताए ।
‘दाजुको जब हत्या भयो त्यसपछि उहाँले प्रजा परिषद्बाट छिन्नभिन्न भएपछि नेपाल प्रजातान्त्रिक संघ भनेर गठन गर्नुभयो । पछि नेपाली कांग्रेसको वास्तविकता देखेपछि, बुझेपछि त्यसबाट अलग हुनुभयो । कम्युनिष्ट पार्टीको स्थापना गर्नुभयो,’ उनले भने ।
