: नेपाल एयरलाइन्सले भोलिदेखि साउदीबाट हप्तामा ३ उडान गर्ने भएको छ। साउदी अरबियाको दमाम-काठमाडौं, काठमाडौं-दमाम नियमित रूपमा हप्तामा ३ उडान भर्ने भएको हो। उडान आइतबार, मंगलबार र बिहीबार हुनेछ।
नेपाल एयरलाइन्सका साउदी कन्ट्री म्यानेजर अन्जु शर्मा मरासिनीका अनुसार हप्तामा तीन पटक उडान हुने बताइन्। यात्रुको बढ्दो चापलाई मध्यनजर गर्दै सो उडान गर्न लागेको उनको भनाइ छ।
यात्रुहरूका लागि टिकटमा ४० केजी चेक-इन लगेज र ७ केजी ह्यान्ड क्यारीको सुविधा, उडानको समय खाना, टिकट मिति परिवर्तन, टिकट रिफन्ड, सिट चयन र अतिरिक्त ब्याग खरिद जस्ता सुविधाहरू उपलब्ध रहेको बताइन। हाललाई एयरलाइन्सको एकातर्फ भाडा दमाम-काठमाडौं १६ हजार ७ सय रुपैयाँ र काठमाडौं-दमाम ३२ हजार ८ सय रुपैयाँसम्म रहेको बताइन्।
साउदीको रियाद सहरबाट पनि पुन उडान सञ्चालनका लागि सम्बन्धित निकायसँग छलफलको अन्तिम चरणमा पुगेको बताइन्। नेपाली राजदूत डा.नरेश विक्रम ढकालले साउदीमा लगभग ४ लाख नेपाली रहेकाले हप्तामा ३ उडान हुनु निकै राम्रो भएको बताए।
नेपाली समुदायलाई उडानमा सहजीकरण भएको र अन्य थप सहरबाट पनि उडानका लागि आफू लगायत दूतावासले सम्बन्धित निकायसँग छलफल गरी आवश्यक प्रक्रिया अघि बढाउने उनको भनाइ छ।
यसअघि विभिन्न कारणले साउदीको रियाद काठमाडौं उडान बन्द भएको थियो। साथै नेपाल कार्गो लैजानको लागि कार्गो एग्रिमेन्ट नभएको कारण साउदी अरबमा मृत्यु भएका नेपालीहरूको शवहरू एयरलाइन्सबाट लान समस्या देखिएकोले सम्बन्धित निकायसँग छलफल भइरहेको समेत बताइन्।
